Masallıda 2 saylı Mediasiya Təşkilatının açılışı
10 oktyabr 2025-ci il tarixdə Masallı şəhəri Heydər Əliyev prospektində Masallı 2 saylı Mediasiya Təşkilatının açılış mərasimi keçirilmişdir.
Açlış mərasimindən öncə Mediasiya Şurasının İdarə Heyətinin sədri Nadir Abilov və İdarə Heyətinin məsul üzvləri Masallı Rayon İcra Hakimiyyətinin başçısı Araz Əhmədovla görüşüb.
Görüş zamanı çıxış edən Masallı Rayon İcra hakimiyyətinin başçısı Araz Əhmədov “Mediasiya” haqqında Azərbaycan Respublikası Qanununun əhəmiyyəti, mübahisələrin alternativ həlli üsullarının günün tələbləri səviyyəsində həlli, barışıq sazişi və müqavilələrin ailə, əmək, iqtisadi və inzibati hüquq münasibətləri çərçivəsində həlli yolları barədə dəyərli tövsiyələr vermişdir.
Daha sonra Mediasiya Şurasının İdarə Heyətinin sədri Nadir Abilov çıxışında qeyd edib ki, ölkə başçısı tərəfindən 2019-cu ildə təsdiqlənmiş bu Qanun cəmiyyət tərəfindən müsbət qarşılanıb və hazırda mediatorlar əhaliyə səmərəli xidmətlər göstərirlər.
O, Masallı rayonunda 1 saylı Mediasiya Təşkilatının uğurlu fəaliyyətini vurğulayaraq, əhalinin artan tələbatını nəzərə alaraq 2 saylı Mediasiya Təşkilatının yaradılmasının əhəmiyyətini qeyd edib.
Mediasiya Şurasının İdarə Heyətinin sədri Nadir Abilov tərəfindən Ulu Öndər Heydər Əliyevin portreti rayon rəhbərinə təqdim olunmuşdur.
Rəsmi qəbuldan sonra Masallı Rayon İcra Hakimiyyəti başçısı aparatının Hüquq şöbəsinin məsləhətçisi Azər Bəhmənov, Mediasiya Şurasının İdarə Heyətinin sədri Nadir Abilov, İdarə Heyətinin məsul üzvləri, Masallı 1 saylı Mediasiya Təşkilatının direktoru Xanhüseyn Səmədov və Masallı 2 saylı Mediasiya Təşkilatının direktoru Tünzalə Qardaşovanın iştirakı ilə Masallı şəhər Heydər Əliyev prospektində Masallı 2 saylı Mediasiya Təşkilatının açılış mərasimi keçirilmişdir.
