Masallıda uzunluğu 6 km olan Boradigah çayının lildən təmizlənməsi işləri yekunlaşıb
Masallı rayon İcra Hakimiyyətinin təşkilatçılığı, Masallı Su Meliorasiya Sistemlərinin istismarı İdarəsinin texnikaları vasitəsi ilə ümumi uzunluğu 6 km olan Boradigah çayının lildən təmizlənməsi istiqamətində aparılan işlər başa çatdırılmışdır. Layihə çayın axın qabiliyyətinin artırılması, daşqın və sel riskinin minimuma endirilməsi, həmçinin ətraf ərazilərin mühafizəsinin gücləndirilməsi məqsədi daşıyıb.
Görülən işlərin tamamlanması ilə əlaqədar Masallı rayon İcra Hakimiyyətinin başçısı Araz Əhmədov, başçının birinci müavini Tohid Hüseynov, aparatın Vətən müharibəsi iştirakçıları və şəhid ailələri ilə işin təşkili şöbəsinin müdiri Qəşəm Hadıyev, Ərazi idarəetmə və yerli özünüidarəetmə orqanları ilə iş şöbəsinin müdir əvəzi Nahid Həsənov, ərazi nümayəndəsi və bələdiyyə sədri ilə birlikdə əraziyə baxış keçiriblər. Baxış zamanı rayon rəhbərinə təmizlənmə prosesinin mərhələləri, istifadə olunan texnika və əldə olunan nəticələr barədə ətraflı məlumat verilib. Rayon rəhbəri görülən işləri yüksək qiymətləndirib və bu tədbirlərin əhalinin təhlükəsizliyi, kənd təsərrüfatı sahələrinin qorunması və suyun normal rejimdə axıdılması baxımından xüsusi əhəmiyyət daşıdığını vurğulayıb.
Qeyd edək ki, çayın lildən təmizlənməsi nəticəsində suyun axın sürəti bərpa olunub, tıxac yaradan çöküntülər aradan qaldırılıb, çay məcrasının ötürmə qabiliyyəti artırılıb. Bu isə həm yaxınlıqdakı yaşayış məntəqələrinin, həm də təsərrüfat obyektlərinin gələcək sel təhlükəsindən qorunmasına mühüm töhfə verəcək.
Rayon rəhbəri görülən işlərin davamlı olaraq nəzarətdə saxlanacağını və lazım olduqda ərazidə əlavə tədbirlərin həyata keçiriləcəyini bildirib.
