MASALLIDA XOCALI FACİƏSİNİN 34-CÜ İLDÖNÜMÜ
26 fevral 2026-ci il tarixdə Masallı şəhər “Qəhrəmanlar parkı”nda Xocalı soyqırımının 34-cü ildönümü ilə əlaqədar anım mərasimi keçirilmişdir.
Səhər saatlarından başlayaraq Masallı şəhər “Qəhrəmanlar parkı”nda şəhidlərin xatirəsinə ucaldılmış abidə kompleksinin önündə Xocalı faciəsi qurbanlarının xatirəsi ehtiramla yad olunmuşdur.
Anım mərasimində Masallı Rayon İcra Hakimiyyətinin başçısı Araz Əhmədov, rayon İcra Hakimiyyətinin əməkdaşları, hüquq-mühafizə orqanlarının rəhbərləri, idarə, müəssisə və təşkilatların nümayəndələri, şəhid ailələri və rayon ictimaiyyətinin üzvləri iştirak etmişlər. İştirakçılar abidə-kompleksi önünə tər gül dəstələri düzərək faciə qurbanlarının xatirəsini dərin hüznlə yad etmiş, həlak olanların ruhuna dualar oxumuşlar.
Mərasimdə çıxış edən rayon rəhbəri bildirmişdir ki, Xocalı soyqırımı Azərbaycan xalqının yaddaşına qanlı səhifə kimi həkk olunmuşdur. 1992-ci ilin fevralında dinc əhaliyə qarşı törədilmiş bu ağır cinayət insanlığa qarşı yönəlmiş amansız soyqırımı aktıdır. Qeyd olunmuşdur ki, faciə qurbanlarının xatirəsi daim uca tutulur və onların əziz xatirəsi heç zaman unudulmayacaqdır.
Mərasimdə şəhidlərin ruhuna dualar oxunmuşdur.
Rayon ərazisində matəm əlaməti olaraq Dövlət Bayrağı endirilmiş, Bakı vaxtı ilə saat 17:00-da soyqırım qurbanlarının xatirəsi bir dəqiqəlik sükutla yad edilmiş, nəqliyyat vasitələrində səs siqnalları verilmişdir.
