Masallıda “Himayədar ailə” qayğı modelinə həsr olunan ictimai dinləmə
- 14-03-2025, 17:47
- Siyasət
- 0
- 316
Masallıda Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin təşkilatçılığı ilə “Himayədar ailə” qayğı modeli barədə məlumatlandırma mövzusuna həsr olunan ictimai dinləmə təşkil olunub.
Masallı Gənclər Evində keçirilən tədbirdə Masallı Rayon İcra Hakimiyyətinin, Sosial Xidmətlər Agentliyinin və digər qurumların, həmçinin qeyri-hökumət təşkilatlarının nümayəndələri, təhsil işçiləri, tələbələr, mövzu ilə bağlı müraciət edən vətəndaşlar iştirak ediblər.
Agentliyin Valideyn himayəsindən məhrum olmuş uşaqlarla iş departamentinin müdir müavini Əhməd Mansurov “Himayədar ailə” qayğı modeli, bu modelin üstünlükləri, müraciət formaları barədə məlumatlar verib.
İştirakçıların diqqətinə çatdırılıb ki, ölkəmiz üçün yeni olan bu model çərçivəsində 37 uşaq artıq himayədar ailələrə yerləşdirilib.
Masallı rayon İcra Hakimiyyəti Başçısı yanında Uşaq hüquqlarının müdafiəzi üzrə komissiyanın məsul katibi Zamin Məmmədov çıxış edərək modelin müəssisələrdə yaşayan uşaqların ailə mühitində yaşamaları, qayğı ilə əhatə olunmaları və sağlam gələcəyi baxımından mühüm əhəmiyyətini vurğulamışdır.
Çıxışlarda “Himayədar ailə” institutunun hüquqi əsasları, himayədar valideyn olmaq istəyən şəxslərin qiymətləndirmə prosesi barədə təqdimatlar edilib, müzakirələr aparılıb və suallar cavablandırılıb.
Bu mövzuya həsr olunan ictimai dinləmələr mütəmadi olaraq müxtəlif ərazilərdə təşkil edilir.
