Rayon rəhbəri Ərkivan qəsəbə ərazisinin Allahyarlı kəndində asfalt örtüyü döşənən avtomobil yoluna baxış keçirib
Masallı rayonunda yol infrastrukturunun müasirləşdirilməsi istiqamətində həyata keçirilən layihələr uğurla davam etdirilir.
11 avqust 2026-cı il tarixində Masallı Rayon İcra Hakimiyyətinin başçısı Araz Əhmədov, başçının birinci müavini Tohid Hüseynov, başçının müavini Adəm Məhərrəmov, aparatın sektor müdiri Qəşəm Hadıyev, 47 saylı Yol İstismarı MMC-nin direktoru Mahmud Bağırov, Ərkivan qəsəbə ərazi nümayəndəliyinin əməkdaşları, şəhid ailələri və kənd sakinləri Allahyarlı kəndində olublar.
Azərbaycan Respublikası Prezidentinin 11 sentyabr 2025-ci il tarixli “Masallı rayonunun Xıl–Sirəbil–Allahyarlı–Molalan–Çayqıraq avtomobil yolunun əsaslı təmiri ilə bağlı tədbirlər haqqında” Sərəncamına uyğun olaraq, rayonun Ərkivan qəsəbə ərazisinin Allahyarlı kəndini əhatə edən avtomobil yolunda asfalt örtüyünün döşənməsinə başlanılıb.
Layihə çərçivəsində ümumi uzunluğu 6,4 kilometr olan avtomobil yolunun müasir standartlara uyğun əsaslı təmiri və asfaltlaşdırılması nəzərdə tutulub.
Masallı Rayon İcra Hakimiyyətinin başçısı Araz Əhmədov yeni asfalt örtüyünün döşəndiyi avtomobil yoluna baxış keçirib, görülən işlərin gedişi və keyfiyyəti ilə maraqlanıb. Aidiyyəti qurumların nümayəndələri tərəfindən rayon rəhbərinə layihənin icrası ilə bağlı ətraflı məlumat verilib.
Rayon rəhbəri səfər zamanı yol məsələsi ilə bağlı daha əvvəl dəfələrlə müraciət etmiş əlilliyi olan və xüsusi qayğıya ehtiyacı olan sakinlərlə də görüşüb. Görüş zamanı Araz Əhmədov sakinlərin müraciətlərinin nəzərə alındığını və uzun müddətdir qaldırdıqları yol probleminin artıq həll olunduğunu bildirib.
Qeyd olunub ki, əlilliyi olan şəxslərin və xüsusi qayğıya ehtiyacı olan vətəndaşların müraciətlərinə daim həssaslıqla yanaşılır, onların problemlərinin həlli istiqamətində zəruri tədbirlər görülür. Bu kateqoriyadan olan insanların rahat və təhlükəsiz hərəkətinin təmin edilməsi də həyata keçirilən yol layihələrində əsas məsələlərdən biri kimi diqqətdə saxlanılır.
Görüş zamanı sakinlər göstərilən diqqət və qayğıdan məmnunluqlarını ifadə edərək, yolun əsaslı təmirinə başlanılmasına və uzun müddətdir qaldırdıqları məsələnin həllinə görə Azərbaycan Respublikasının Prezidenti cənab İlham Əliyevə və rayon rəhbərliyinə minnətdarlıqlarını bildiriblər.
Qeyd olunub ki, yolun əsaslı təmiri kənd sakinlərinin rayon mərkəzi və digər yaşayış məntəqələri ilə nəqliyyat əlaqələrinin daha rahat və təhlükəsiz təşkilinə, yük və sərnişin daşımalarının səmərəliliyinin artırılmasına, həmçinin ərazinin sosial-iqtisadi inkişafına mühüm töhfə verəcək.
Rayon rəhbəri bildirib ki, Azərbaycan Respublikasının Prezidenti cənab İlham Əliyevin regionların sosial-iqtisadi inkişafına göstərdiyi xüsusi diqqət və qayğı nəticəsində Masallı rayonunda yol infrastrukturunun yenilənməsi istiqamətində ardıcıl layihələr həyata keçirilir. Bu layihələr əhalinin həyat şəraitinin yaxşılaşdırılmasına, yaşayış məntəqələri arasında rahat və təhlükəsiz nəqliyyat əlaqələrinin təmin edilməsinə, eləcə də kənd təsərrüfatı və sahibkarlıq fəaliyyətinin inkişafına əlverişli şərait yaradır.
Tədbirdə çıxış edən Allahyarlı kənd sakinləri kəndin yol infrastrukturunun yaxşılaşdırılmasına göstərilən diqqət və qayğıya görə Azərbaycan Respublikasının Prezidenti cənab İlham Əliyevə minnətdarlıqlarını ifadə ediblər. Sakinlər yolun əsaslı təmirinin kəndin inkişafı, nəqliyyat əlaqələrinin yaxşılaşdırılması və gündəlik həyatlarının daha da rahatlaşdırılması baxımından mühüm əhəmiyyət daşıdığını bildiriblər.
