ALLAH RƏHMƏT ELƏSİN
- 18-02-2025, 10:06
- Maraqlı
- 0
- 217
MƏMMƏDAĞA MƏMMƏDƏLİ OĞLU ŞİRİYEV
Masallı rayon ictimaiyyətinə itki üz verib.
Gözəl insan, vətənpərvər ziyalı, Müharibə, Əmək və Silahlı Qüvvələr veteranları təşkilatı Masallı rayon şöbəsinin sədri, ehtiyatda olan polis polkovnik-leytenantı Məmmədağa Məmmədəli oğlu Şiriyev 16 fevral 2025-ci il tarixində, ömrünün 74-cü ilində dünyasını dəyişib.
Məmmədağa Məmmədəli oğlu Şiriyev 26 noyabr 1950-ci ildə Masallı rayonunun Ərkivan kəndində anadan olub. Orta təhsilini Cəfər Cabbarlı adına Ərkivan kənd orta məktəbində alıb. Sonra Azərbaycan Politexnik İnstitutuna daxil olub. Tələbəliyi 1969-1974-cü illəri əhatə edir. Avtomobil istismarı ixtisasına yiyələnib, işləmək üçün Özbəkistan Respublikasına təyinat alıb. 1979-cu ilin payızında Özbəkistanın Qaşqadərya vilayətində yolların təhlükəsizliyini təmin edən dəstəyə rəhbərlik edib. 1981-ci ildə ikinci ali məktəbə – SSRİ DİN Daşkənd Ali Milis Məktəbinə qəbul olub, 1986-cı ildə “Fərqlənmə” diplomu ilə qurtarıb. 1982-ci ildən Mübarək Rayon Dövlət Yol Polisi Xidmətində rəhbər vəzifədə işləyib.
1989-cu ildən Azərbaycanda, DİN sistemində xidmətini davam etdirib. 1989-1991-ci illərdə Astara RPŞ-də, 1991-1996-cı illərdə Boradigah polis bölməsində (Masallı) işləyib. 1996-2005-ci illərdə Masallı RPŞ-nin qərargah rəisi – rəis köməkçisi vəzifəsində çalışıb. 13 dekabr 2005-ci ildə polis polkovnik-leytenantı rütbəsində istefaya çıxıb.
İşlədiyi müddətdə dəfələrlə mükafatlandırılıb, “Milis əlaçısı” döş nişanı (1977), Usta məharət dərəcəsi, “Daxili İşlər orqanlarında qüsursuz xidmətlərə görə“ medalları ilə təltif olunub, tutduğu xidməti vəzifə rütbəsindən bir pillə yuxarı -polkovnik-leytenant xüsusi rütbəsinə mükafat qaydasında (1997) layiq görülüb.
M. Şiriyev 2014-cü ildə Müharibə, Əmək, Silahlı Qüvvələr və Hüquq-mühafizə orqanları veteranları təşkilatı Masallı rayon şöbəsinin sədri vəzifəsinə seçilib. İşlədiyi dövrdə “Veteran həmrəyliyi ”, “Qələbənin 70 və 75 illiyi “ (2015, 2020), General Həzi Aslanov və Azərbaycan Respublikası Müharibə, Əmək, Silahlı Qüvvələr və Hüquq-mühafizə Orqanları Veteranları Təşkilatının yaradılmasının 30 illiyi ( 1988-2018) yubiley medalları ilə təltif edilib.
YAP Masallı Rayon Təşkilatı və Ağsaqqallar Şurasının fəal üzvü idi.
Məmmədağa Şiriyev rayonun ictimai-siyasi həyatında yaxından iştirak edirdi. Bu fəaliyyətinə görə dəfələrlə Masallı Rayon İcra Hakimiyyətinin, YAP rayon təşkilatının və digər təşkilatların Fəxri fərman və qiymətli hədiyyələri ilə mükafatlandırılıb.
O, İkinci Dünya müharibəsi - 1941-1945-ci illər Böyük Vətən Müharibəsindəki qəhrəmanlıq salnaməsi, həmçinin Birinci Qarabağ müharibəsinə həsr olunmuş “Masallıdan Qələbəyədək” adlı 2 cildlik kitabın müəllifidir.
Məmmədağa Şiriyev dövlətini, millətini sevən insan idi. İstər polis orqanlarında, istərsə də ictimai vəzifələrdə çalışdığı müddətdə işinin öhdəsindən layiqincə gəlirdi. Rayon ərazisində yaşayan Böyük Vətən Müharibəsi iştirakçıları, şəhid ailələri ilə mütəmadi əlaqə saxlayır, gənc nəslə vətənpərvərlik nümunəsi göstərir, onlara əsl vətəndaş olmağın sirlərini öyrədirdi.
Mehriban, qayğıkeş ailə sahibi idi. Həyat yoldaşı, polis mayoru Validə Şiriyeva ilə ailədə 5 övlad böyüdüblər.
Xalqa, el-obasına bağlı ağsaqqal, vətənpərvər ziyalı Məmmədağa Şiriyev onu tanıyanların qəlbində əbədi yaşayacaqdır.
"Yeni həyat" qəzeti,
www.yeniheyet.az
