MƏRHƏMƏT ÜNVANI, ŞƏFQƏT ÜMMANI
- 4-04-2025, 16:33
- Maraqlı
- 0
- 296
Minnətdarlıq
Sağlamlığımızın, şəfqətimizin cəfakeşləridir həkimlər. Çünki çarəsiz qaldığımız anlarda bizi xoş, gülərüzlə qarşılayan bu ağ xalatlı mələkləri görəndə daxilən rahatlıq tapır, gözlərimizdə həyat eşqi, yaşam sevinci parlayır...
Bir müddət öncə səhhətimdə problem yarandı. Sol böyrəyimdə yaranan şiddətli ağrılar səbəbindən Masallı rayon Mərkəzi Xəstəxanasında uroloji müayinə olundum. Nəticə etibabarilə həmin nahiyədə müəyyən ölçülü kristal daşlar aşkarlandı.
Cərrahi əməliyyat olunmaqdan ötrü Mərkəzi Neftçilər Xəstəxanasına müraciət etdim. Urologiya şöbəsinin müdiri, cərrah uroloq-androloq Mirqabil Cavadovun tövsiyəsi ilə bir neçə müayinədən keçdikdən sonra onun rəhbərliyilə mini-perkutan nefrolitotripsiya üsulu ilə əməliyyata alındım. Və əməliyyat uğurla sonuclandı.
Ən müasir tibbi avadanlıqlarla təmin olunan və peşəkar tibb heyətlə komplektləşdirilən Mərkəzi Neftçilər Xəstəxanasının rəhbərliyinə cəhiyyə ocağında yaradılan şəraitə görə, sadə, təvazökar, işində məsuliyyətli, ixtisasında peşəkar həkim-uroloq Mirqabil Cavadova, Qaraca Rüstəmova, yüksək insani keyfiyyətləri, bilik və bacarıqları, xəstələrə qarşı mehriban, səmimi davranışları ilə fərqlənən bütün tibbi personala, o cümlədən sığorta qeydiyyat şöbəsinin işçisi Xatirə Yolçuyevaya, böyük tibb bacısı Arzu Vahidovaya, tibb bacıları Sevinc Əhmədovaya, Svetlana Mişkaryovaya, Sərmayə Mahmudovaya, Leyla Fərzəliyevaya, Mehriban Naftaliyevaya, xəstə baxıcıları İlahə Osmanovaya, Ruhin Tağıyevə, Zeynəb Xəlilovaya və başqalarına mənə göstərdikləri yüksək tibbi xidmətə görə dərin minnətdarlığımı bildirirəm.
Tibbi müəssisədə müalicə aldığım müddətdə urologiya şöbəsinin bu gülərüz, mehriban kollektivi mənim kimi digər xəstələrdə də könül xoşluğu yaratdı. Hər kəs burdakı həkim və tibb bacılarının diqqət və qayğısından razılıqlarını bildirirdilər.
Məlumat üçün bildirim ki, Mirqabil Mirqasım oğlu Cavadov 1985-ci il iyulun 19-da Göyçə mahalında anadan olub. Bakı şəhərindəki 57 nömrəli tam orta məktəbini, respublika kimya-biologiya liseyini bitirib.
Azərbaycan Dövlət Tibb Universitetinin müalicə-profilaktika fakültəsində (2003-2009), Respublika Klinik Xəstəxanasının urologiya şöbəsinin internaturasında (2009-2010), Türkiyənin Ondokuz Mayıs Universitetinin tibb fakültəsinin urologiya və böyrək köçürmə şöbəsində (2011¬-2013) ali təhsil alıb.
İlk əmək fəaliyyətinə Respublika Klinik Xəstəxanasının urologiya şöbəsində uroloq-interna kimi başlayan M.Cavadov müxtəlif vaxtlarda Türkiyənin Ondokuz Mayıs Universitetinin tibb fakültəsinin nəzdindəki urologiya və böyrək köçürmə şöbəsində (2011-2013), 2013 ildən Mərkəzi Klinikanın urologiya şöbəsində uroloq, sonra isə Bonadea Beynəlxalq Klinikasinda çalışıb. Hazırda Mərkəzi Neftçilər Xəstəxanasında işləyir, urologiya şöbəsinin müdiridir.
Müqəddəs peşəsinə qəlbən bağlanan həkim-uroloq Mirqabil Cavadov sistit, epididimit, sidik kisəsində daş xəstəliyi, uretrit və s. kimi uroloji profilli xəstəliklərin diaqnostikası və müalicəsi ilə məşğuldur.
Onun icra etdiyi prosedurlar böyrək və sidik yollarının daş cərrahiyəsi, kənardan səs dalğaları ilə daşqırma (ESWL), prostat vəzi, sidik kisəsi xəstəliklərinin diaqnostikası, dərman və cərrahi müalicəsi, endoskopik, laparoskopik, uşaq və qadın urologiyası, andrologiyadan (kişi sonsuzluğu, mikroskopik varikosel cərrahiyəsi, penis cərrahiyyəsi, penis protezlərinin yerləşdirilməsi və s.) ibarətdir.
Doktor Mirqabil Cavadovun əmək fəaliyyətinə yazılan əlamətdar hadisələrdən ən önəmlisi TƏBİB-in tabeliyində fəaliyyət göstərən Mərkəzi Neftçilər Xəstəxanasının urologiya şöbəsində İcbari Tibbi Sığorta üzrə Dövlət Agentliyi çərçivəsində 2023-cü ilin 11 ayı ərzində 1000, 2024-cü il ərzində isə 1500 cərrahi əməliyyatın icrası olub.
Bacarıqlı mütəxəssis, yaxşı həkim olmaqla yanaşı, yüksək əxlaqi-mənəvi dəyərlərə sahib bir insan kimi tanıdığım Mirqabil Cavadovun timsalında hər kəsin şəfqət, mərhəmət ünvanına çevrilən bu ülvi peşə sahiblərinə, nəcib, xeyixah missiya daşıyıcılarına – ağxalatlı qəhrəmanlarımıza çətin və şərəfli xidmətlərində uğurlar arzulayırıq.
Akif AĞAYEV,
jurnalist-publisist.
