Cəbrayıl şəhəri günü – qəhrəmanlıq və qürur günü

       
Cəbrayıl şəhərinin azadlığına qovuşmasından beş il ötür. Müzəffər Ali Baş Komandan İlham Əliyevin 2020-ci il oktyabrın 4-də xalqa verdiyi "Bu gün Azərbaycan Ordusu Cəbrayıl şəhərini və rayonun bir neçə kəndini işğaldan azad etmişdir. Eşq olsun Azərbaycan Ordusuna! Qarabağ Azərbaycandır!" müjdəli xəbəri sanki dünən kimi xatırlanır. Amma artıq Cəbrayıl azaddır, dirçəlir, doğma sakinlərinə qovuşur.
           
 Tarixə nəzər salsaq  1930-cu ildə təşkil edilən Cəbrayıl rayonu 4 yanvar 1963-cü ildə ləğv edilərək Füzuli rayonuna birləşdirilib. 17 iyun 1964-cü ildə ayrıca rayon kimi  yenidən yaradılıb. Rayon 1993-cü il avqustun 23-də Ermənistan silahlı qüvvələri tərəfindən işğal edilmişdi. İşğal zamanı Cəbrayıl rayonu 1 şəhər, 4 qəsəbə və 92 kənddən ibarət idi.
         
Cəbrayıl düşmən tapdağından xilas edilən ilk şəhər idi. Vətən müharibəsinin ilk günlərindən Cəbrayıl rayonunun kəndləri bir-bir işğaldan azad edilirdi. Dövlət başçısı bu sevincli xəbərləri xalqla bölüşürdü. İlk gündə rayonun Böyük Mərcanlı və Nüzgar kəndləri, oktyabrın 3-də isə Mehdili, Çaxırlı, Aşağı Maralyan, Şəybəy və Quycaq kəndləri, 4 oktyabr tarixdə isə Cəbrayıl şəhəri ilə yanaşı, rayonun 9 kəndi - Karxulu, Şükürbəyli, Çərəkən, Daşkəsən, Horovlu, Mahmudlu, Cəfərabad, Yuxarı Maralyan və Decal qüdrətli ordumuz tərəfindən işğaldan azad edilmişdi. Uğurlu  əməliyyatlar zamanı Cəbrayıl şəhəri və rayonun 90 kəndi işğaldan azad edildi. Həmçinin Azərbaycanın İranla dövlət sərhədinə nəzarət qismən bərpa edildi.
           
Cəbrayıl şəhəri günü tarixi hadisənin ildönümü kimi hər il böyük sevinc və qürur hissi ilə qeyd olunur. Bu gün həm qəhrəman şəhidlərimizin xatirəsinə ehtiram, həm də xalqımızın əzmkar mübarizəsinə bir minnətdarlıqdır.

Hazırda Cəbrayıl torpaqlarında genişmiqyaslı quruculuq və bərpa işləri həyata keçirilir. Müasir infrastruktur, yollar, məktəblər, yaşayış evləri inşa olunur. Şəhərin yenidən dirçəlməsi Azərbaycanın inkişaf yolunun, azad olunmuş torpaqlara qayıdışın parlaq nümunəsidir.
           
Cəbrayıl şəhəri günü yalnız bir tarixi qələbənin xatırlanması deyil, həm də gələcəyə inamın, milli birliyin və vətən sevgisinin təcəssümüdür. Bu gün bizə bir daha xatırladır ki, xalqımızın iradəsi və dövlətimizin qüdrəti qarşısında heç bir güc dayana bilməz.




Əntiqə Tağıyeva,
YAP-nın fəal üzvüшаблоны для dle 11.2