Masallıda tədbir: “Vətənin bütövlüyü – sözün qüdrəti”
- 24-12-2025, 18:24
- Maraqlı
- 0
- 257
Masallı Dövlət Regional Kolleci və Masallı rayon Mərkəzləşdirilmiş Kitabxana Sisteminin birgə təşkilatçılığı ilə 31 Dekabr – Dünya Azərbaycanlılarının Həmrəylik Günü və xalq şairi Bəxtiyar Vahabzadənin anadan olmasının 100 illiyi münasibətilə “Vətənin bütövlüyü – sözün qüdrəti” adlı tədbir təşkil olunub.
Əvvəlcə iştirakçılar Bəxtiyar Vahabzadənin həyat və yaradıcılığını əks etdirən kitab sərgisi ilə tanış olub, videoçarx izləyiblər.
Masallı Gənclər Evinin akt zalında keçirilən tədbirdə Ulu Öndər Heydər Əliyevin və Azərbaycanın ərazi bütövlüyü uğrunda canlarından keçən şəhidlərin əziz xatirəsi bir dəqiqəlik sükutla yad edilib, Dövlət Himni səsləndirilib.
Masallı Dövlət Regional Kollecinin direktoru Rövşən Qurbanov, direktor müavini Dilarə Hüseynova, Yeni Azərbaycan Partiyası Masallı rayon təşkilatının sədri Seyfəddin Əliyev və Masallı rayon Mərkəzləşdirilmiş Kitabxana Sisteminin direktoru Zamin Məmmədov milli birlik və həmrəyliyin dövlətimizin gücünün əsas sütunlarından biri olduğunu bildiriblər. Onlar Bəxtiyar Vahabzadə yaradıcılığının xalqın milli kimliyinin, vətənpərvərlik və milli bütövlük ideyalarının gənc nəslə aşılanmasında mühüm əhəmiyyət daşıdığını vurğulayıblar.
Tədbir zamanı bir qrup müəllim və tələbə fəxri fərman və hədiyyələrlə təltif edilib.
Sonda kollecin müəllim və tələbələrinin iştirakı ilə hazırlanan ədəbi-bədii proqram təqdim olunub və tədbir xoş təəssüratlarla yekunlaşıb.
Akif AĞAYEV
