Yeni kitablar
- 30-12-2023, 16:18
- Maraqlı
- 0
- 328
“Dinlə mənim qəlbimi”
“Kövsər” mətbəəsində çapdan çıxmış “Dinlə mənim qəlbimi” kitabın müəllifi incə duyğulu şair-publisist Sülhiyyə Tağızadədir. Bu, onun ikinci kitabıdır ki, işıq üzü görür.
Müəllif kitabı Məhsəti Gəncəvinin
Bu dünya bir şirin kuzəyə bənzər,
Suyu gah şirindir, gah da ki zəhər.
-Kövrək misraları ilə başlayır. Bu, oxucunu müəllifin həyatda çətin anlar yaşamaq anlamına gətirir. Sülhiyyə xanım ömür yolunun eniş-yoxuşu barədə özü oxucuya bilgilər verir. Yazır ki, uşaq ikən atamı itirmişəm, demək olar ki, üzünü görməmişəm, ata nəfəsini duymamış, nəvazişlərinə həsrət qalmışam. Lənkəranda doğulsam da atamın ölümündən sonra Gülgəz ana məni Masallı şəhərinə gətirib. Uşaqlıq, gənclik illərim bu şəhərlə bağlıdır.Buradakı N.Nərimanov adına 2 nömrəli orta məktəbi bitirmişəm.
Sülhiyyə xanım sonralar Bakı Plan-İqtisad texnikumunda təhsil alıb, lakin anasının xəstə olduğunu eşidib rayona qayıdıb.
Müəllif ilk kitabı “Bir palıd və onun iki budağı”nda ömür yolundakı narahatlığı ilə bağlı oxucuları ətraflı tanış edir və təəssüflə yazırdı:
Görənlər bəxtəvər bildilər məni,
İçim məni yedi, çölüm özgəni.
Dəyişik salmışam günü, həftəni,
Karvan getdi, sən gecikdin, Sülhiyyə.
Kitabı oxuduqca görmək olur ki, Sülhiyyə xanım həyatı öyrənən, hadisələri yaddaşında möhkəm saxlayıb, sonra fikirlərini ağ vərəqlərə səpən yazardır.O, insanların çətin durumundan narahat olan, onların həyat burulğanında mənəvi cəhətdən əzilən məqamlarına biganə qalmır:
Övladlarım bir-bir tərk etdi məni,
Həyatın zərbəsi məhv etdi məni,
Şair dostlarım da yad etdi məni,
Canım yanıb-yanıb kül oldu, Allah.
Müəllif ailəsi, dostları, tanışlarını unutmur. Onların hər biri barədə oxucuya məlumat verir. Povestə bənzəyən xatirələrində onun bütün həyatı, xarakteri, insanlara münasibəti – sədaqət, etibar, dəyanət, sözübütövlük özünü göstərir.
Sülhiyyənin qələmə aldığı esselərdə hiss, həyəcan oxucunu düşündürür. Bu, xüsusilə orta məktəbdə ona dərs vermiş müəllimlər haqqında yazdığı esselərdə daha təsirlidir.
Dünyanın sirrini öyrəndim ondan,
Nə tez ötdü günlər, zaman yetişdi.
Son dəfə görüşüb ayrıldım səndən,
Bax, “Son zəng” çalındı , məqam yetişdi.
Müəllifin dünya, Vətən haqqındakı şeirlərində də sadəlik, lakoniklik özünü biruzə verir. 2019-cu ildə qardaş Türkiyədə olsa da Vətən deyib qələmə sarılır.
Asan deyil səndən ayrı,
Yad ölkədə ömür sürmək.
Yaşamaram səndən ayrı,
Qucağında ölüm, Vətən.
Sülhiyyə xanımın şair dostları da onun kövrəkliyini, sadəliyini, etibarını unutmurlar. Həmyerlimiz mərhum şair Qulu Vəcioğlu onun 55 illiyinə yazdığı şeirində xoş, səmimi münasibəti oxucuda ətirli duyğular yaradır:
Ürək açır qələminin qüdrəti,
Dalğa-dalğa yayılır şan-şöhrəti,
Salatın tək bayraq edib qeyrəti,
Pişvazına gül-çiçəklə gəlmişəm.
Ömrünün 60-na əlvida deyən Sülhiyyə xanım bu gün də yazıb yaradır. Dövri mətbuatda esseləri, hekayə və şeirləri çap olunur. Biz də narahat şairəyə qəlb rahatlığı, yeni-yeni yaradıcılıq uğurları arzulayırıq.
Südabə Məmmədova,
AJB-nin üzvü.
"Yeni həyat" qəzeti,
www.yeniheyet.az
