“Qisası indiyə saxlamışdıq biz” – Masallıda anım tədbiri
26-02-2025, 09:53. Разместил: admin44
Masallıda Xocalı soyqırımının 33-cü ildönümü ilə əlaqədar tədbir keçirildi.Lənkəran-Astara Regional Mədəniyyət İdarəsi Masallı rayon Mədəniyyət Mərkəzi və Masallı Dövlət Regional Kollecinin təşkilatçılığı ilə gerçəkləşən tədbirdə rayon rəsmiləri, idarə və təşkilat rəhbərləri, şəhid ailələri, mədəniyyət işçiləri, ictimaiyyət nümayəndələri iştirak edirdi.
Nizami Gəncəvi adına şəhər Mədəniyyət Mərkəzindəki tədbir öncəsi soyqırım qurbanlarının, Vətənimizin müstəqilliyi və bütövlüyü uğrunda canlarını fəda edən şəhidlərimizin xatirəsi bir dəqiqəlik sükutla yad olundu.
Sonra “Viləş” uşaq bağçasının təqdimatında soyqırıma həsr edilmiş videoçarx izlənildi.
İki şəhid – Aprel döyüşləri qəhrəmanı Nurlan Əsgərli və Vətən Müharibəsi Qəhrəmanı İntiqam Əsgərlinin anası Ziba Əsgərova bəşəriyyətə, insanlığa qarşı yönəlmiş, dünyanın ən dəhşətli qətliamlarından olan Xocalı soyqırımı hadisələrindən, Prezident İlham Əliyevin rəhbərliyi ilə şanlı ordumuzun və xalqın şücaəti nəticəsində 44 günlük Vətən müharibəsindəki parlaq qələbəmizdən danışdı: “İgid övladlarımızın qəhrəmanlığı ilə torpaqlarımızı işğaldan azad etdik, haqq-ədaləti bərpa etdik. Ali Baş Komandanımızın 2023-cü il oktyabrın 15-də Xocalı şəhərində Azərbaycanın Dövlət Bayrağını ucaltması soyqırımı qurbanlarının qanının yerdə qalmadığını, onların qisasının alındığını bir daha sübuta yetirdi...”
Daha sonra Masallı Xalq Teatrının həvəskar aktyorları, kollec tələbələri və Kürdəbaz, Qarğalıq yaradıcılıq klubu üzvlərinin iştirakı ilə Xocalı soyqırımına həsr olunan “Qisası indiyə saxlamışdıq biz” adlı ədəbi-bədii kompozisiya nümayiş etdirildi.
Sonda tədbirin hazırlanmasında fəallıq göstərənlərə şəhid anası Ziba Əsgərova tərəfindən “Cəsur qardaşlar” fəxri fərmanı təqdim olundu.
Akif AĞAYEV.
Вернуться назад