Ələşrəf Niftiyev 80

19 iyun 2025-ci il tarixdə Masallıda Rayon Ağsaqqallar Şurasının sədri Niftiyev Ələşrəf Nuru oğlunun anadan olmasının 80 illik yubileyi qeyd olunmuşdur.  

Yubiley tədbirində Masallı rayon İcra Hakimiyyətinin başçısı Araz Əhmədov, başçının birinci müavini Tohid Hüseynov, aparatın əməkdaşları, Respublika Ağsaqqallar Şurasının sədr müavini İbrahim Quliyev, YAP Masallı Rayon Təşkilatının sədri Seyfəddin Əliyev, şəhid ailələri, mədəniyyət xadimləri, ictimaiyyət və media nümayəndələri iştirak etmişdir.

İlk öncə tədbir iştirakçıları Ələşrəf Niftiyevin müəllifi olduğu kitablar və qəzetlərdə dərc edilən məqalələrdən ibarət sərgi ilə tanış oldular.

Masallı şəhər Gənclər evində baş tutan tədbir Ulu Öndər Heydər Əliyevin, Azərbaycan Respublikasının suverenliyi və ərazi bütövlüyü uğrunda canından keçən şəhidlərimizin əziz xatirəsinin 1 dəqiqəlik sükutla yad edilməsi  ilə başladı.

Tədbiri Masallı rayon Ağsaqqallar Şurasının sədr müavini Əyyub Mehtiyev açaraq yubliyarın həyat və yaradıcılığı barədə qısa məlumat verdi. 

Sonra çıxış edən Masallı rayon İcra Hakimiyyətinin başçısı Araz Əhmədov qeyd etdi ki, rayonun ictimai-siyasi həyatında fəal iştirak edən Niftiyev Ələşrəf Nuru oğlu 47 ildən artıq müxtəlif vəzifələrdə çalışmış, əmək pensiyasına çıxdıqdan sonra 3 il Rayon Ağsaqqallar Şurasının sədrinin müavini olmuş, 2016-cı ildən hal-hazıradək şuranın sədridir. Xidmətlərinə görə "III dərəcəli Vətənə xidmətə görə" ordeni, "Heydər Əliyevin 100 illiyi (1923–2023)" yubiley medalı, "Fəxri Ağsaqqal" döş nişanı və "Qızıl qələm" mükafatına layiq görülmüşdür. Ələşrəf Niftiyev həmçinin 23 kitabın, irihəcmli yüzlərlə məqalə, elmi-publisistik, pedaqoji və ictimai mövzularda yazıların, tərcümələrin müəllifidir. Nüfuzlu ziyalı, təcrübəli təşkilatçı, tanınmış ziyalı Ələşrəf Niftiyevin ömür yolu gənclərimiz üçün əsl örnəkdir. O, Heydər Əliyev ideyalarına həmişə sədaqətlidir. Ələşrəf müəllim Masallının simasını təmsil edən ziyalıdır. 

Yubiley tədbirində çıxış edən Respublika Ağsaqqallar Şurasının sədr müavini İbrahim Quliyev, Rayon Ağsaqqallar Şurasının idarə heyətinin üzvü, iki şəhid anası Ziba Əsgərova, YAP Masallı Rayon Təşkilatının sədri Seyfəddin Əliyev, Rayon Ağsaqqallar şurasının üzvü Əli Əlişov, Əməkdar jurnalist, tərcüməçi Zakir Abbas, Azərbaycan Yazıçılar Birliyinin Lənkəran bölməsinin sədri Qafar Cəfərli yubilyarın çoxşaxəli yaradıcılıq uğurlarından danışıb, xatirələrini bölüşdülər.

Tədbirin sonunda Masallı rayon İcra Hakimiyyəti başçısı Araz Əhmədov Ələşrəf Niftiyevə rayonun  ictimai-siyasi həyatında fəal iştirakı və 80 illik yubileyi münasibətilə Fəxri fərman təqdim etdi.

AJB-nin üzvü