Masallıda Mənzil Kommunal Təsərrüfatı İstehsalat birliyi tərəfindən genişmiqyaslı abadlıq işləri
- 18-07-2025, 14:18
- Maraqlı
- 0
- 295
Masallı şəhərində Mənzil Kommunal Təsərrüfatı İstehsalat birliyi tərəfindən ətraf mühitin sağlamlaşdırılması, şəhərin abad və səliqəli saxlanılması məqsədi ilə tədbirlər ardıcıl olaraq davam etdirilir.
Belə ki, Masallı Rayon İcra Hakimiyyətinin ətrafında genişmiqyaslı abadlıq və təmizlik işləri həyata keçirilmişdir. Yaşıllıq zolaqları təmizlənmiş, quru yarpaqlar və məişət tullantıları toplanaraq ərazidən daşınmışdır. Eyni zamanda, ərazidəki ağacların gövdələri əhənglənərək rənglənmiş, ümumi görünüş estetik baxımdan yenilənmişdir.
Masallı şəhər Qəhrəmanlar Parkı-Abidə kompelsi gündəlik olaraq təmizlənir, park ərazisində şəhidlərin xatirə lövhələri və şəkilləri mütəmadi olaraq silinərək təmizlənir, onların qorunub saxlanmasına xüsusi diqqət yetirilir. Eyni zamanda, ərazidəki ağaclardan tökülən yarpaqlar və digər tullantılar hər gün toplanaraq parkın ümumi görünüşünün səliqəli saxlanılması təmin olunur. Bu işlər vətəndaşlara rahat və abad istirahət mühiti yaratmaq məqsədilə davam etdirilir.
Masallı şəhər Heydər Əliyev parkında yerləşən fəvvarələr və fantanlar xüsusi avadanlıqlarla yuyularaq tam şəkildə təmizlənmiş, ağaclardan tökülmüş yarpaqlar isə süpürülərək ərazidən yığılmış və ümumi təmizlik işləri aparılmış, parkda abadlıq işləri çərçivəsində oturacaqların yenidən rənglənməsi işləri həyata keçirilir.
Əlavə olaraq Masallı Mənzil Kommunal Təsərrüfatı İstehsalat Birliyi tərəfindən şəhər ərazisində sahibsiz və nəzarətsiz itlərin tutulması istiqamətində tədbirlər gündəlik əsasda davam etdirilir.
