Azərbaycan Prezidentinə yazırlar

Mən, bir şəhid valideyniyəm. Həyat yoldaşımın uzun müddət çox güclü ağrıları var idi. O, yeriməyi bacarmırdı, gündəlik işləri ilə məşğul ola bilmirdi. Biz çıxış yolu axtara-axtara və dövlətimizin dəstəyi ilə yerli klinikalardan birinə üz tutduq. Orada bizi böyük hörmətlə qarşıladılar və yoldaşımı əməliyyat etdilər. Əməliyyatdan sonra həyat yoldaşımın ağrıları tamamilə keçdi. O, indi əvvəlki kimi rahat hərəkət edir, normal həyatına qayıdıb.

Cənab Prezident, torpaqlarımızın işğaldan azad olunması uğrunda canından keçmiş şəhidlərin əziz xatirələrinin hər zaman uca tutulmasına, onların ailələrinə göstərilən diqqət və qayğıya, o cümlədən həyat yoldaşımın səhiyyə müəssisəsində uğurla əməliyyat olunmasına görə Sizə və bu işdə əməyi olan hər kəsə təşəkkür edirəm. Xüsusilə qeyd etmək istəyirəm ki, şəhid ailələrinə olan hörmət və qayğı bizə böyük mənəvi dəstəkdir.