Masallıda “Gənclik və Hüquq” mövzusunda tədbir
- 29-10-2025, 19:46
- Maraqlı
- 0
- 241
29 oktyabr 2025-ci il tarixdə Masallı Dövlət Regional Kollecində Masallı Rayon İcra Hakimiyyəti və Masallı Dövlət Regional Kollecinin birgə təşkilatçılığı ilə “Konstitusiya və Suverenlik İli”nə həsr olunmuş “Gənclik və Hüquq” adlı tədbir keçirilmişdir.
Tədbirdə Masallı RİHB aparatının İctimai-siyasi və humanitar məsələlər şöbəsinin baş məsləhətçisi Flora İbadova, Masallı Tarix-Diyarşünaslıq muzeyinin direktoru Əntiqə Tağıyeva, Masallı Dövlət Regional Kollecinin direktor müavini Dilarə Hüseynova, media nümayəndələri, kollecin kollektivi və tələbələri iştirak etmişlər.
Tədbirin əvvəlində Ulu Öndər Heydər Əliyevin və torpaqlarımızın işğaldan azad olunması uğrunda gedən döyüşlərdə qəhrəmancasına şəhid olmuş şəhidlərin xatirəsi bir dəqiqəlik sükutla yad edilmişdir.
Tədbiri giriş nitqi ilə açan Masallı Dövlət Regional Kollecinin direktor müavini Dilarə Hüseynova qeyd edib ki, Konstitusiya dövlətin əsas hüquqi sənədi olmaqla, hüquqi dövlətin əsasını təşkil edir, vətəndaşların hüquq və azadlıqlarını təsbit edir. Suverenlik isə xalqın öz müqəddəratını təyinetmə hüququnu, dövlətin öz ərazisi daxilində ali hakimiyyətə malik olmasını, beynəlxalq arenada bərabərhüquqlu subyekt kimi çıxışını və müstəqil qərarlar qəbul etməsini təmin edir.
Daha sonra çıxış edən Masallı RİHB aparatının İctimai-siyasi və humanitar məsələlər şöbəsinin baş məsləhətçisi Flora İbadova bildirib ki, Azərbaycan Respublikasının Prezidenti İlham Əliyevin 2024-cü il 28 dekabr tarixli Sərəncamı ilə 2025-ci il Azərbaycan Respublikasında “Konstitusiya və Suverenlik İli” elan edilmişdir. Bu ilin “Konstitusiya və Suverenlik İli” olaraq seçilməsi heç də təsadüfi deyil belə ki, məhz 2025-ci il Azərbaycan Respublikası Konstitusiyasının qəbulunun 30-cu, eyni zamanda Vətən müharibəsində qazanılmış Zəfərin 5-ci ildönümünə təsadüf edir. “Konstitusiya” sözü latın mənşəlidir və Azərbaycan dilinə tərcümədə “quruluş”, “təsisat” mənalarını verir. Müasir anlayışda isə bu, dövlətin ali və ən yüksək hüquqi qüvvəyə malik olan Əsas Qanunu deməkdir.
Sonda Masallı Tarix-Diyarşünaslıq muzeyinin direktoru Əntiqə Tağıyeva və Masallı Dövlət Regional Kollecinin tarix müəllimi Nazim Əliyev çıxış edərək bildirmişlər ki, Müstəqillik və suverenlik hər bir millətin sahib ola biləcəyi ən qiymətli sərvətdir. Hər bir xalqın müstəqillik salnaməsi və suverenlik yolu onun malik olduğu dövlətçilik ənənələrindən, azadlıq düşüncəsindən, milli-mənəvi irsindən, tarixi keçmişindən və intellektual potensialından asılı olaraq formalaşır və yaşadılır.
