Su təhlükəsizliyi Azərbaycan hökumətinin gündəliyində: Azərbaycan Prezidenti İlham Əliyevin 12 yanvar müşavirəsindəki çıxışı

Bu gün, 16:05
Maraqlı

Azərbaycan Prezidenti İlham Əliyevin 12 yanvar müşavirəsindəki çıxışında bildirdi ki, Bakı şəhəri və Abşeron yarımadasında su təchizatı, tullantı və yağış suları sistemlərinin təkmilləşdirilməsinə dair 2026-2035-ci illəri əhatə edən Dövlət Proqramına həsr olunmuş mühüm iclasın keçirilməsi Azərbaycanın uzunmüddətli inkişaf strategiyasında su təhlükəsizliyinin xüsusi yer tutduğunu bir daha sübut etdi. Həmin müşavirə təkcə infrastruktur məsələlərinin müzakirəsi yox, həmçinin, sosial həyat rifahının daha da yüksəldilməsi, ekoloji təhlükəsizliyin təmin olunması və dayanıqlı şəhərsalma siyasətinin mühüm tərkib hissəsi kimi dəyərləndirilməlidir. Azərbaycan Prezidenti çıxışında qeyd etdiyi kimi Bu gün dünyada iqlim dəyişikliyi ilə bağlı ciddi narahatlıq hökm sürür. Bir çox ölkələr artıq bundan ciddi zərər görür. Bizim su təhlükəsizliyimizlə bağlı olan bütün məsələlər sistem şəklində öz həllini tapır. Qeyd etdiyim kimi, son 20 il ərzində ancaq sadaladığım, - halbuki görülən işlər qat-qat çoxdur, - layihələr onu göstərir ki, əgər vaxtında bu addımlar atılmasaydı, bu gün su təhlükəsizliyimizlə bağlı olan məsələlər bizim üçün çox ciddi problemlər yarada bilərdi. Bizim məqsədimiz isə əhalini və sənayeni, kənd təsərrüfatını dayanıqlı su ilə təmin etməkdir, su mənbələrini qorumaqdır, su anbarlarının potensialını artırmaqdır, uçotu tam yaratmaqdır və mövsüm gələndə suları yığmaqdır ki, sonra il boyunca onlardan istifadə edək.
Bakının və Abşeron yarımadasının içməli su problemləri əfsuslar olsun ki, uzun illər ciddi problem kimi qarşımızda durur. Qeyd etdiyim kimi, bu istiqamətdə müəyyən işlər görülüb. Ancaq mən hesab edirəm, vaxt gəlib çatıb ki, genişmiqyaslı və müfəssəl dövlət proqramı qəbul edilsin. Bu proqram Bakı şəhərini, onun qəsəbələrini, Sumqayıt şəhərini və Abşeron rayonunu əhatə edəcək. Bir müddət bundan əvvəl mənim göstərişimlə proqramın hazırlanması prosesi başlamışdır və demək olar ki, proqram hazırdır. Biz bu gün həm bu proqramı müzakirə edəcəyik, eyni zamanda, görülmüş işlərdən danışacağıq və görüləcək işlərlə bağlı müzakirə aparacağıq.

Dövlət başçısının qeyd etdiyi kimi Bakı, Abşeron yarımadası və Sumqayıt ölkə əhalisinin böyük hissəsinin birlikdə yaşamasının, sənaye, nəqliyyat və xidmət sahələrinin intensiv inkişaf etdiyiyi ərazilərdir. Elə buna görə də Bakı, Abşeron yarımadası və Sumqayıt şəhəri regionunda su infrastrukturunun müasir zamanın, günün tələbləri səviyyəsində inkişaf etdirilməsi dövlət siyasətinin prioritetlərindəndir. Belə ki, Dövlət Proqramında Sumqayıt şəhərinin də siyahıda olması Azərbaycan Prezidenti cənab İlham Əliyevin uzun illərin sənaye şəhərinə göstərdiyi ardıcıl diqqət və qayğınıntəzahürüdür. Son illər ölkə başçısının tapşırıqlarına əsasən məhz Sumqayıt şəhərində mühüm sənaye, sosial və infrastruktur layihələr yaradılıb, şəhərin iqtisadi potensialıdaha da yüksəlib. Əvvəldən kimya sənayesi kimi ad tapan Sumqayıtda, sənaye parkları, yeni istehsal sahələrinin yaradılması Sumqayıtın şöhrətini, adını daha da yüksəldib.

Azərbaycan Prezidenti İlham Əliyevin çıxışının sonunda qeyd etdiyi kimi, proqram çox genişdir, çox konkretdir. Bütün vəzifələr orada qoyulub, nəzarət də təmin ediləcək, həm Hökumət tərəfindən, həm də Prezident Administrasiyası tərəfindən. İctimai nəzarət də əlbəttə ki, mütləq olmalıdır. Bu proqramın icrası mətbuatda geniş işıqlandırılmalıdır ki, Azərbaycan vətəndaşları, xüsusilə Bakı və Abşeronda yaşayan insanlar görsünlər, bilsinlər ki, nə vaxt hansı məsələ öz həllini tapır və yubanmalar da olmamalıdır. Çünki yenə də deyirəm, proqram 2035-ci ilə qədər nəzərdə tutulur. Biz hesab edirdik ki, bunu daha da tez bir zamanda etmək mümkündür. Ancaq tələsməmək üçün və bütün işləri keyfiyyətlə təşkil etmək üçün qərara gəldik ki, təxminən 10 illik proqramdır, yəni kifayət qədər vaxt var, ancaq bir gün də yubanma olmamalıdır.