Diplomatik korpus nümayəndələrinin Qarabağ və Şərqi Zəngəzura səfərinə erməni revanşist qüvvələrin reaksiyası
- Bu gün, 13:59
- Maraqlı
- 0
- 8
Azərbaycanda akkreditə olunmuş diplomatik korpus nümayəndələrinin Qarabağ və Şərqi Zəngəzura səfərləri bölgədə aparılan genişmiqyaslı bərpa və quruculuq işləri ilə yanaşı, Azərbaycanın yaratdığı yeni reallıqların beynəlxalq ictimaiyyətə çatdırılması baxımından mühüm əhəmiyyət daşıyır. Xarici diplomatların həmin ərazilərdə vəziyyətlə bilavasitə tanış olması, həyata keçirilən layihələri və insanların geri qayıdışı prosesini müşahidə etməsi obyektiv məlumat əldə etmək baxımından əhəmiyyətlidir.
Belə səfərlər Azərbaycanın postmünaqişə dövründə əsas prioritetlərini – ərazilərin bərpası, təhlükəsizliyin təmin edilməsi, məcburi köçkünlərin öz doğma torpaqlarına qayıdışının təşkili və regionda davamlı sülhün möhkəmləndirilməsi istiqamətində fəaliyyətini nümayiş etdirir. Diplomatların real vəziyyətlə yerində tanış olması beynəlxalq səviyyədə bölgə ilə bağlı daha dolğun və obyektiv təsəvvürün formalaşmasına xidmət edir.
Bununla belə, Ermənistanın bəzi revanşist dairələrinin və radikal qüvvələrinin bu səfərlərə mənfi münasibət göstərməsi diqqət çəkir. Sözügedən qüvvələrin reaksiyalarında, bir qayda olaraq, Azərbaycanın ərazi bütövlüyünün bərpasından sonra yaranmış reallıqları qəbul etməmək, keçmiş münaqişə ritorikasını davam etdirmək və beynəlxalq ictimaiyyətdə Azərbaycana qarşı mənfi rəy formalaşdırmaq cəhdləri müşahidə olunur.
Politoloji baxımdan bu yanaşma revanşist düşüncənin əsas xüsusiyyətlərindən biridir. Revanşist qüvvələr yeni regional reallıqları qəbul etmək əvəzinə keçmiş siyasi və hərbi vəziyyətin bərpasına yönəlmiş ritorikadan istifadə edirlər. Xarici diplomatların Qarabağ və Şərqi Zəngəzura səfərinə qarşı etirazların da məhz bu kontekstdə qiymətləndirilməsi mümkündür.
Azərbaycan üçün isə əsas məsələ sülh və regional əməkdaşlıq perspektivinin gücləndirilməsidir. Diplomatik nümayəndələrin səfərləri bu baxımdan şəffaflığın təmin edilməsinə, Azərbaycanın mövqeyinin izah olunmasına və beynəlxalq diplomatik dairələrin bölgədəki prosesləri birbaşa müşahidə etməsinə imkan yaradır.
Nəticə etibarilə, erməni revanşist qüvvələrin bu səfərlərə neqativ reaksiyası keçmiş münaqişə yanaşmalarının hələ də müəyyən dairələrdə qorunduğunu göstərir. Lakin regionda dayanıqlı sülhün təmin edilməsi üçün əsas şərtlərdən biri keçmişin qarşıdurma məntiqindən uzaqlaşaraq yeni reallıqları qəbul etməkdir. Qarabağ və Şərqi Zəngəzurda aparılan bərpa prosesi və beynəlxalq diplomatların bu proseslərlə yerində tanışlığı Azərbaycanın postmünaqişə gündəliyinin beynəlxalq aləmə çatdırılması baxımından mühüm siyasi və diplomatik vasitə kimi çıxış edir.
Aybəniz Novruzova,
Masallı RİHBA-nın İctimai-siyasi və humanitar məsələlər sektorunun aparıcı məsləhətçisi
