Masallıda şəhid haqqında çəkilmiş filmin təqdimatı olub
- 8-06-2021, 15:20
- Mədəniyyət
- 0
- 827

"Arzuma çatdım..."
İyunun 8-də Masallı rayon Mədəniyyət Mərkəzində Vətən müharibəsi şəhidi Famil Əlizadənin xatirəsinə ithaf olunmuş "Arzuma çatdım..." adlı sənədli filminin təqdimatı olub.
Pandemiya qaydaları gözlənilməklə keçirilən təqdimat mərasimində Masallı Regional Mədəniyyət İdarəsinin rəhbərliyi, şəhidin ailə üzvləri və KİV nümayəndələri iştirak edib.

"Nur" studiyası (yaradıcı heyət: Faiq Mirzə, Elsevər Əliyev) və Masallı Regional Mədəniyyət İdarəsi N.Gəncəvi adına Masallı Rayon Mədəniyyət Mərkəzinin birgə layihəsi çərçivəsində hazırlanan filmdə Famil Əlizadənin həyatı və şərəfli döyüş yolu barədə yaxınları, ziyalılar və doğulduğu Ərkivan qəsəbə sakinlərinin xatirələri yer alıb. Eləcə də filmdə canlandırılan hər bir epizod Familin hünər və şücaəti barədə tamaşaçıda aydın təsəvvür yaradır.

Məlumat üçün bildirək ki, Famil Habil oğlu Əlizadə 3 may 1999-cu ildə Masallı rayonunun Ərkivan qəsəbəsində dünyaya göz açıb. 2016-cı ildə Ərkivan qəsəbə 3 nömrəli tam orta məktəbini bitirib. Təhsilini 2 nömrəli Bakı Peşə Liseyində davam etdirib. Elektrik avadanlıqlarına xidmət və təmiri üzrə elektrik mantyoru peşəsinə yiyələnib. 2017-ci ilin iyulunda SHXÇDX Masallı rayon şöbəsi tərəfindən hərbi xidmətə çağırılıb. 2019-cu ilin yanvarında ordudan tərxis olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş qapşırıqların icrası zamanı vəzifə borcunu şərəflə yerinə yetirdiyinə, şəxsi igidliyi və şücaəti nümayiş etdirdiyinə görə Azərbaycan Respublikasının Prezidenti İlham Əliyevin müvafiq Sərəncamlarına əsasən Famil Əlizadə ölümündən sonra «Vətən uğrunda» və ”Füzulinin azad olunmasına görə” medalları ilə təltif edilib.

Akif AĞAYEV,
“Yeni həyat”,
www.yeniheyet.az