Masallıda abadlıq və xeyriyyə işləri 01-20 may 2025
- 21-05-2025, 14:02
- Maraqlı
- 0
- 197
Rayonda əhalinin sosial rifahının yüksəldilməsi və infrastrukturun müasirləşdirilməsi məqsədilə bir sıra mühüm tədbirlər həyata keçirilmişdir. Xüsusilə ərazilərdə əhalinin gündəlik həyat şəraitinin yaxşılaşdırılması istiqamətində təmir-bərpa, abadlıq, elektrik, qaz, su xətlərində təmir və yenidənqurma işləri aparılmışdır. Əkin sahələrinin suvarılması və sel təhlükəsinin qarşısının alınması məqsədilə su kanallarının təmizlənməsi və bərpası işləri görülmüşdür. Aztəminatlı ailələrə və yardıma ehtiyacı olan şəxslərə maddi yardım göstərilmişdir.
Belə ki, Masallı Su Meliorasiya Sistemlərinin İstismarı İdarəsi tərəfindən Xırmandalı və Xıl ərazilərində suaparıcı kanallar təmizlənilmişdir.Türkoba ərazisində nümayəndəlik, bələdiyyə və kənd sakinləri tərəfindən pay torpaqlarına gedən yola, Viləş ərazisində təsərrüfat suyunun verilməsi üçün kanala su borusu atılmışdır.
Masallı Elektrik Şəbəkəsi tərəfindən Böyük Kolatan ərazisində elektrik təsərrüfatında təmir işləri aparılırmışdır. Xırmandalı ərazisinin Ərəb kəndində şəhid atası Sarbala Babayev və xeyriyyəçilər tərəfindən 300 metr məsafəyə gecə işıqlandırma sistemi quraşdırılmışdır. I Səmədxanlı ərazisində xeyriyyəçilər tərəfindən 85 ədəd gecə işıqlandırma dirəyi bastırılmışdır.
Göyəçöl, Sərçuvar və Hişkədərə ərazilərində bayraqlar yenisi ilə əvəz olunmuşdur. Təzə Alvadı ərazisində Ulu Öndər Heydər Əliyevin fikirlərini əks etdirən barelyefin hər iki tərəfində yerləşən yazılar yenilənmiş, ətrafı daşla hörülmüş və müxtəlif növ gül əkilmişdir. Böyük Kolatan ərazisində şəhidlərin şəkili olan lövhə yenisi ilə əvəzlənmişdir. Boradigah, Musaküçə, Hişkədərə və Qızılavar ərazilərində 1941-1945 abidəsində abadlıq işləri həyata keçirilmişdir.
Köhnə Alvadı ərazi nümayəndəliyi və Güllütəpə bələdiyyəsi tərəfindən xərçəng xəstəliyindən əziyyət çəkən iki vətəndaşa ümumilikdə 2550 manat maddi yardım olunmuşdur. Bədəlan və Türkoba ərazilərində xeyriyyəçilər tərəfindən aztəminatlı ailələrə ərzaq yardımı olmuşdur. Yeyənkənd ərazisində xeyriyyəçilər tərəfindən medal qazanan gənc idmançıya 650 manat maddi dəstək göstərilmişdir. Yeyənkənd ərazisində xeyriyyəçilər tərəfindən Yeyənkənd kənd tam orta məktəbində 5 sinif otağının qapısı yenisi ilə əvəz olunmuş, kənddə məişət tullantılarının yığılması üçün 18 ədəd qutu alınmışdır.
Yeyənkənd ərazisinin Xəlfələr kəndində xeyriyyəçilər tərəfindən mərkəzi yolun kənarı ilə gedən ümumi uzunluğu 1374 metr olan 10 atmosferə dözümlü polietilen boru vasitəsi ilə qaz xəttinin çəkilməsi işlərinə başlanılımışdır. Banbaşı ərazisinin Böyük Xocavar kəndində xeyriyyəçilərin maddi dəstəyi ilə yanmış evin tikinti işləri yekunlaşmış və təmir işlərinə başlanılmışdır. Miyanku ərazisinin Kubin kəndində məscidin və Sığdaş ərazisinin Babaküçə kəndində mərasim evinin təmir işləri aparılmışdır.
Bu kimi tədbirlər Masallı rayon İcra Hakimiyyətinin əhalinin rifahı naminə apardığı siyasətin bir göstəricisidir və gələcəkdə bu işlərin daha geniş miqyasda davam etdirilməsi nəzərdə tutulur.
