Masallının Şatıroba kəndində 21 may 2025-ci il tarixdə səyyar qəbul
21 may 2025-ci il tarixdə rayonun Türkoba ərazisinin Şatıroba kəndində Masallı Rayon İcra Hakimiyyətinin başçısı Araz Əhmədovun sakinlərlə növbəti səyyar görüş-qəbulu keçirilmişdir. Səyyar görüş-qəbulda Prezident Administrasiyasının məsul əməkdaşı Dəyanət Abdullayev iştirak etmişdir.
Masallı Rayon İcra Hakimiyyətinin Başçısı Araz Əhmədov səyyar görüş-qəbulunu açaraq ərazinin tarixi, ziyalıları, ağsaqqalları, mədəniyyəti, məşğuliyyəti və sosial iqtisadi inkişafı barədə çıxış etmişdir.
Sonra rayon rəhbəri sözü Masallı rayon İcra Hakimiyyəti başçısı aparatının Sənədlərlə və vətəndaşların müraciətləri ilə iş şöbəsinin müdiri Elvin Fəttayevə verərək ötən səyyar görüş-qəbulu zamanı vətəndaşların müraciətlərinin həlli vəziyyəti və ərazidə görülmüş işlər barədə ətraflı məlumat verməsini istəmişdir.
Aparatın şöbə müdiri Elvin Fəttayev çıxış edərək ərazidə ötən qəbul zamanı 6 nəfər vətəndaş tərəfindən 11 məsələ qaldırıldığını, məsələlərdən 6-nın müsbət həll olunduğunu, 5 məsələ ilə bağlı vətəndaşlara qanunamüvafiq cavab verildiyini bildirmişdir.
Sonra şöbə müdiri ərazidə görülmüş işlər barədə məlumat verərək qeyd etmişdir ki, şəhid ailələri, imtiyazlı şəxslərə və yardıma ehtiyacı olan insanlara məişət, kommunal və digər peroblemlərinin həlli ilə bağlı köməklik göstərilmiş, Şatıroba kəndində şəhid Natiq Əkbərov adına olan küçəyə 460 metr, kənddaxili yola isə 650 metr asfalt örtüyü döşənmiş, ərazi üzrə 1,8 km məsafədə daxili yollara çınqıl tökülərək hamarlanmış və 200 metr yol qreyderlənmiş, ərazidə 35 ədəd yararsız elektrik dirəyi və 300 metr elektrik xətti yenisi ilə əvəz olunmuş, Qəzvinoba kəndində 1 ədəd yeni transformator quraşdırılmış və 800 metr yeni elektrik xətti çəkilmiş, Şatıroba kəndində ümumilikdə 400 metr məsafədə küçələr işıqlandırılmış, ərazidə 1 km məsafədə suaparıcı kanallar təmizlənmiş və 3 ədəd suaparıcı kanalın keçidinə borular qoyulmuşdur. GPON lahiyəsi üzrə “Aztelekom” İB və “CityNet” MMC şirkətləri tərəfindən ərazinin bütün yaşayış məntəqələrinə yeni internet xətti çəkilərək əhalinin istifadəsinə verilmişdir.
Daha sonra şöbə müdiri “Yaşıl dünya naminə həmrəylik ili” çərçivəsində 600 ədəd, “Konstitusiya və Suverenlik ili” çərçivəsində isə 850 ədəd olmaqla ümumilikdə 1450 ədəd ağac əkilməsi, Türkoba kənd tam orta məktəbinin həyətində Səməd Vurğunun heykəli təmir olunaraq ətrafının abadlaşdırılması, Türkoba kənd məscidində 1 ədəd kondisioner quraşdırılması və kənd qəbiristanlığında çardaq tikilməsi, Şatıroba kəndində 200 metr məsafədə suaparıcı kanalın ətəylərinin mişar daşı ilə hörülməsi və kəndin giriş lövhəsinin inşa edilməsi, yeni inşa edilmiş Qəzvinoba kənd ümumi orta məktəbin istifadəyə verilməsi, Qəzvinoba kənd məscidinin təbii qazla təmin olunması və kənddə yeni işıqforun quraşdırılması barədə məlumatları görüş iştirakçılarının nəzərinə çatdırmışdır.
Sonra rayon rəhbəri qəbula gələn vətəndaşları narahat edən məsələlərlə bağlı müraciətlərini dinləmiş, qəbul zamanı qaldırılan məsələlərin qeydiyyata alınması və nəzarətdə saxlanılmasını təmin etmək məqsədi ilə tapşırıqlarını vermişdir.
Prezident Administrasiyasının məsul əməkdaşı çıxış edərək səyyar görüş-qəbulların cənab Prezident İlham Əliyevin göstərişinə uyğun olaraq keçirildiyini və görüşlərin insanların gündəlik qayğı və problemlərinin öyrənilməsi, onları narahat edən məsələlərin yerində araşdırılması, habelə obyektiv qaldırılan məsələlərin ədalətli həllinə nail olunması məqsədi daşıdığını qeyd etmişdir.
Masallı Rayon İcra Hakimiyyətinin başçısı Araz Əhmədov səyyar-görüş qəbulunu yekunlaşdıraraq rayonda vətəndaş müraciətlərinin daim diqqətdə saxlanıldığını bildirmişdir.
