Masallı rayon Mədəniyyət Mərkəzində “Layiqli əmək fəaliyyətlərini inkişaf etdirək” mövzusunda tədbir keçirilib

 

Masallı rayon Nizami Gəncəvi adına Mədəniyyət Mərkəzində Azərbaycan Mədəniyyət İşçiləri Həmkarlar İttifaqının Masallı rayon komitəsinin təşkilatçılığı ilə 7 Oktyabr – Layiqli Əmək Uğrunda XVI Ümumdünya Fəaliyyətlər Günü münasibətilə “Layiqli əmək fəaliyyətlərini inkişaf etdirək” adlı tədbir keçirilib.

Tədbirdə mədəniyyət işçiləri, əmək veteranları və digər təşkilatların əmək kollektivləri iştirak edib.

Həmkarlar İttifaqının Masallı rayon komitəsinin sədri Vəkil İsmailov tədbirdə layiqli əməyin təşkili və inkişaf etdirilməsi sahəsində görülən işlərdən geniş söz açıb. Qeyd olunub ki, yerli komitə öz sıralarında 362 üzvü, tərkibində isə 4 ilk təşkilatı birləşdirir. Bu tərkibə mədəniyyət evləri, klublar, uşaq incəsənət məktəbi, kitabxanalar, muzey və muzey tipli müəssisələr, bir sıra gənclər və idman qurumları daxildir.

Bildirilib ki, son illər ərzində yerli komitə tərəfindən işçi kollektivləri üçün keyfiyyətli və təhlükəsiz iş şəraitinin yaradılması, ədalətli əməkhaqqı fondunun formalaşdırılması, etibarlı və dayanıqlı sosial müdafiənin yaradılması istiqamətində müəyyən addımlar atılmış, eyni zamanda işəgötürən-işçi münasibətlərinin əmək qanunvericiliyi bazasında ədalətli nizamlanmasına dair fəaliyyətlər daha da genişləndirilmişdir. V.İsmailov əlavə edib ki, görülən praktik işlərlə yanaşı, maarifləndirici tədbirlərin görülməsinə də diqqət ayrılır, işçilərə əmək hüquqlarının müxtəlif aspektlərinə dair izahlar verilir, həmçinin onlar əmək mübahisələri və onlara rəvac verən amillərlə bağlı mütəmadi məlumatlandırılırlar.

Sonrakı çıxışlarda natiqlər iş yerlərində layiqli əmək fəaliyyətlərinin genişləndirilməsinin əhəmiyətinə diqqəti çəkib, bu sahədə gələcək perspektivləri nəzərdən keçiriblər.

Mövzuya dair qarşılıqlı fikir mübadiləsi və müzakirələrdən sonra tədbirə yekun vurulub.




"Yeni həyat" qəzeti,
www.yeniheyet.az

 шаблоны для dle 11.2