Masallının Təzə Alvadı kəndində rayon rəhbərinin 09 aprel 2025-ci il tarixdə səyyar görüş-qəbulu
09 aprel 2025-ci il tarixdə rayonun Təzə Alvadı kəndində Masallı Rayon İcra Hakimiyyətinin Başçısı Araz Əhmədov ərazinin sakinləri ilə növbəti səyyar görüş-qəbulunu keçirmişdir.
Masallı Rayon İcra Hakimiyyətinin Başçısı Araz Əhmədov səyyar görüş-qəbulunu açıq elan edərək qəbula gələn vətəndaşları salamlamış, ərazinin tarixi, ziyalıları, ağsaqqalları, mədəniyyəti, məşğuliyyəti və sosial iqtisadi inkişafı barədə çıxış etmişdir.
Sonra rayon rəhbəri sözü Masallı rayon İcra Hakimiyyəti Başçısı aparatının Sənədlərlə və vətəndaşların müraciətləri ilə iş şöbəsinin müdiri Elvin Fəttayevə verərək ötən səyyar görüş-qəbulu zamanı vətəndaşların müraciətlərinin həlli vəziyyəti və ərazidə görülmüş işlər barədə ətraflı məlumat verməsini istəmişdir.
Aparatın şöbə müdiri Elvin Fəttayev çıxış edərək ərazidə ötən qəbul zamanı 3 nəfər vətəndaş tərəfindən 4 məsələ qaldırıldığını, məsələlərdən 2-nin müsbət həll olunduğunu, 1 məsələnin nəzarətdə olduğunu və 1 məsələ ilə bağlı vətəndaşa qanunamüvafiq cavab verildiyini bildirmişdir.
Sonra şöbə müdiri ərazidə görülmüş işlər barədə məlumat verərək qeyd etmişdir ki, şəhid ailələri, aztəminatlı ailələr və kimsəsizlərə məişət, eləcədə işıq, qaz problemlərinin həlli ilə bağlı yardımlar göstərilmiş , ərazidə 1,8 km məsafədə kənddaxili yol cari təmir olunmuş, 5 km məsafədə kənddaxili yola çınqıl tökülərək hamarlanmış və əlavə olaraq 4 km yol qreyderlənmiş, ərazinin bütün kəndlərində elektrik təsərrüfatı SİP kabelləşdirilmiş və 2,5 km məsafədə küçə işıqlandırılması işləri aparılmış, Təzə Alvadı kəndində 62 mənzildən ibarət yeni məhəllənin təbii qazla təmin olunmasından ötrü qaz xətti çəkilmişdir. FHN-nin rəyindən sonra qaz xətti istismara veriləcək, GPON lahiyəsi üzrə “Aztelekom” İB, “CityNet” MMC və “SelNet” MMC şirkətləri tərəfindən yeni internet xətləri çəkilərək abonentlərin istifadəsinə verilmişdir.
Daha sonra şöbə müdiri Təzə Alvadı kənd 2 saylı tam orta və Əhmədli kənd ümumi orta məktəblərində istilik sisteminin quraşdırılması işlərinə başlanılması, Ələs-Astara magistral avtomobil yolunun Təzə Alvadı kəndindən keçən hissəsində işıqforların quraşdırılması, Meşəkənarı və Əhmədli kəndlərinin mərasim evlərində cari təmir işlərinin aparılması, Təzə Alvadı kəndində şəhidlər abidə kompleksinin tikilməsi, ərazidə hər ay 31 ailəyə ümumilikdə 5600 manat dəyərində ərzaq, maddi və digər yardımların göstərilməsi, Təzə Alvadı kənd qəbiristanlığının daxilində 950 metr uzunluğunda piltə döşənməsi və ərazi üzrə ümumilikdə 340 ədəd ağacın əkilməsi barədə məlumatları görüş iştirakçılarının nəzərinə çatdırmışdır.
Sonra rayon rəhbəri qəbula gələn vətəndaşları narahat edən məsələlərlə bağlı müraciətlərini dinləmiş, qəbul zamanı çıxış edən vətəndaşların müraciətinə həssaslıqla yanaşmış, qaldırılan məsələləri qeydiyyata alaraq nəzarətə götürülməsini təmin etmiş və müraciətlərin həlli istiqamətində tapşırıqlarını vermişdir.
Masallı Rayon İcra Hakimiyyətinin Başçısı Araz Əhmədov səyyar-görüş qəbulunu yekunlaşdıraraq rayonda vətəndaş müraciətlərinin daim diqqətdə saxlanıldığını bildirmişdir.
