Masallının Ərkivan qəsəbəsində rayon rəhbərinin 16 aprel 2025-ci il tarixdə səyyar görüş-qəbulu
16 aprel 2025-ci il tarixdə rayonun Ərkivan qəsəbəsində Masallı Rayon İcra Hakimiyyətinin Başçısı Araz Əhmədov ərazinin sakinləri ilə növbəti səyyar görüş-qəbulunu keçirmişdir.
Masallı Rayon İcra Hakimiyyətinin Başçısı Araz Əhmədov səyyar görüş-qəbulunu açıq elan edərək qəbula gələn vətəndaşları salamlamış, ərazinin tarixi, ziyalıları, ağsaqqalları, mədəniyyəti, məşğuliyyəti və sosial iqtisadi inkişafı barədə çıxış etmişdir.
Sonra rayon rəhbəri sözü Masallı rayon İcra Hakimiyyəti Başçısı aparatının Sənədlərlə və vətəndaşların müraciətləri ilə iş şöbəsinin müdiri Elvin Fəttayevə verərək ötən səyyar görüş-qəbulu zamanı vətəndaşların müraciətlərinin həlli vəziyyəti və ərazidə görülmüş işlər barədə ətraflı məlumat verməsini istəmişdir.
Aparatın şöbə müdiri Elvin Fəttayev çıxış edərək ərazidə ötən qəbul zamanı 7 nəfər vətəndaş tərəfindən 8 məsələ qaldırıldığını, məsələlərdən 5-nin müsbət həll olunduğunu, 1 məsələnin nəzarətdə olduğunu və 2 məsələ ilə bağlı vətəndaşa qanunamüvafiq cavab verildiyini bildirmişdir.
Sonra şöbə müdiri ərazidə görülmüş işlər barədə məlumat verərək qeyd etmişdir ki, şəhid ailələri, aztəminatlı ailələr və kimsəsizlərə məişət, eləcədə işıq, qaz problemlərinin həlli ilə bağlı yardımlar göstərilmiş, Ərkivan qəsəbəsində 2 transformator yenisi ilə əvəz olunmuş, 22 transformator cari təmir olunmuş, 103 ədəd elektrik dirəyi və 500 metr məsafədə elekttik xətti yenisi ilə əvəz olunmuş, ərazidə 1,6 km məsafədə asfalt örtüyü döşənmiş, 10,5 km məsafədə daxili yola çınqıl tökülmüş və 3 km yol qreyderlə hamarlanmışdır. Ümumi uzunluğu 4,7 km olan Ərkivan-Allahyarlı yolunda əsaslı təmir işlərinə başlanılmış, GPON lahiyəsi üzrə “CityNet” MMC şirkəti tərəfindən əraziyə yeni internet xətti çəkilərək əhalinin istifadəsinə verilmiş və “Aztelekom” İB tərəfindən isə yeni internet xəttinin çəkilişi davam etdirilir, ərazi üzrə ümumilikdə 2 km məsafədə suaparıcı kanal təmizlənmiş və “Yaşıl dünya naminə həmrəylik ili” və “Konstitusiya və suverenlik ili” çərçivəsində ərazidə ümumilikdə 3000 ədəd ağac əkilmişdir.
Daha sonra şöbə müdiri qəsəbənin Miyondi, Ramazanlı məhələləri və Allahyarlı kəndinin giriş lövhələrinin təmir olunması, Güləş idman zalının əsaslı təmir olunması, Ərkivan qəsəbə 5 saylı ümumi orta məktəbin sinif otaqlarının əsaslı təmir olunması, Ərkivan qəsəbə 4 saylı tam orta məktəbində cari təmir işlərinin aparılması, vətəndaşa məxsus yanmış fərdi yaşayış evinin yenidən tikilərək istifadəyə verilməsi, Qızılaküçə və Göllü məhəllələrində xanımlar üçün mərasim evi tikilmiş hazırda təmir işlərinin davam etdirilməsi, Ərkivan-Boradigah yolunda 800 metr və Ərkivan-Qəriblər yolunda 600 metr olmaqla ümumilikdə 1,4 km məsafədə köhnə gecə işıqlandırılma sisteminin yenilənməsi, Pələngküştə məhəlləsində 1,2 km məsafədə gecə işıqlandırılması sisteminin quraşdırılması, Ərkivan-Boradigah yolunda 1,7 km məsafədə bardürün rənglənməsi, Ərkivan qəsəbə uşaq bağçasında Şuşa şəhərindən olan məcburi köçkünün məskunlaşdığı otaqlarda əsaslı təmir işlərinin aparılması, ərazi üzrə imtiyazlı və aztəminatlı ailələrə 38000 manat dəyərində ərzaq yardımı olunması barədə məlumatları görüş iştirakçılarının nəzərinə çatdırmışdır.
Sonra rayon rəhbəri qəbula gələn vətəndaşları narahat edən məsələlərlə bağlı müraciətlərini dinləmiş, qəbul zamanı çıxış edən vətəndaşların müraciətinə həssaslıqla yanaşmış, qaldırılan məsələləri qeydiyyata alaraq nəzarətə götürülməsini təmin etmiş və müraciətlərin həlli istiqamətində tapşırıqlarını vermişdir.
Masallı Rayon İcra Hakimiyyətinin Başçısı Araz Əhmədov səyyar-görüş qəbulunu yekunlaşdıraraq rayonda vətəndaş müraciətlərinin daim diqqətdə saxlanıldığını bildirmişdir.
