Masallıda Rayon rəhbəri Şəhid analarını ziyarət etdi
25.04.2025-ci il tarixdə Masallı Rayon İcra Hakimiyyətinin Başçısı cənab Araz Əhmədov, aparatın Vətən müharibəsi iştirakçıları və şəhid ailələri ilə işin təşkili şöbəsinin müdiri Qəşəm Hadiyev və Memarlıq və tikinti şöbəsinin müdir əvəzi Zamin Kazımov Masallı Rayon Mərkəzi Xəstəxanasında müalicə alan şəhid analarını ziyarət etmişlər.
Rayon rəhbəri şəhid Ətrafil Məmmədov və şəhid Rasim Ağayevin analarını müalicə aldıqları Masallı Rayon Mərkəzi Xəstəxanasında ziyarət edərək onların səhhəti, müayinə və müalicə prosesi ilə maraqlanmışdır.
Ziyarət zamanı Masallı Rayon Mərkəzi Xəstəxanası Publik Hüquqi Şəxsin direktoru İlqar Ramizoğlu şəhid analarının hazırkı sağlamlıq durumu və aparılan tibbi müdaxilələr barədə məlumat verərərək bildirmişdir ki, hər iki şəhid anasının vəziyyəti stabildir və hazırda həkim nəzarətindədirlər.
Azərbaycan Respublikasının Prezidenti Cənab İlham Əliyevin şəhid ailələrinə və qazilərə yönəlik sosial siyasəti Masallıda da ardıcıl və məsuliyyətlə həyata keçirilir.
Ziyarət zamanı rayon rəhbəri qeyd etmişdir ki, şəhidlərimiz Vətənin ərazi bütövlüyü uğrunda canlarından keçiblər və onların ailələri hər zaman dövlətimizin, cəmiyyətimizin diqqət və qayğısı ilə əhatə olunur.
Bu cür humanist addımlar həm şəhid ailələrinin mənəvi dəstəyə olan ehtiyacını qarşılayır, həm də dövlətin və yerli idarəetmənin bu ailələrə olan hörmət və sədaqətini bir daha nümayiş etdirir.
Cəmiyyətimiz üçün müqəddəs olan şəhidlik zirvəsi və bu zirvəyə ucalan qəhrəmanların ailələri daim yüksək dəyərə layiqdir.
