Azərbaycan Respublikası Müharibə, Əmək və Silahlı Qüvvələr Veteranları Təşkilatı Masallı rayon təşkilatının konfransı
30 aprel 2025-ci il tarixdə Azərbaycan Respublikası Müharibə, Əmək və Silahlı Qüvvələr Veteranları Təşkilatı (MƏSQ VT) Masallı rayon təşkilatının konfransı keçirilib.
Tədbirdə müstəqil Azərbaycan dövlətinin banisi, Ümummilli lider Heydər Əliyevin və şəhidlərimizin xatirəsi bir dəqiqəlik sükutla yad olunub.
Masallı Rayon İcra Hakimiyyəti başçısı aparatının İctimai-siyasi və humanitar məsələlər şöbəsinin müdir vəzifəsini müvəqqəti icra edən Zamin Məmmədov rayon rəhbəri cənab Araz Əhmədovun salamlarını konfrans iştirakçılarına çatdırıb.
Sonra rayon təşkilatının sədrinin vəzifələrini icra edən Ramiz Tağıyev fəaliyyəti barədə hesabat məruzəsi ilə çıxış edib.
Veteran müəllim Əziz Hüseynov, veteran polis işçisi Vidadi Məmmədəliyev, “Tərəqqi medallı veteran jurnalist Əyyub Mehdiyev, veteran müəllim və dövlət qulluqçusu Vaqif Şükürov, Qarabağ müharibəsi veteranı Cəmil Məmmədov, Masallı rayon Ağsaqqallar Şurasının sədri, "Vətənə xidmətə görə" ordenli və "Heydər Əliyevin 100 illiyi (1923–2023)" yubiley medallı Ələşrəf Niftiyev, Banbaşı kəndindən olan 86 yaşlı ehtiyatda olan polkovnik Rəsul Qurbanov və başqaları ötən dövrdə görülmüş işlərdən danışıblar.
Konfransda Azərbaycan Respublikası Müharibə, Əmək və Silahlı Qüvvələr Veteranları Təşkilatı Masallı rayon təşkilatına yeni sədr təyin olunması ilə bağlı səsvermə keçirilmiş və yekun səslə MƏSQ VT Masallı rayon şöbəsinin sədri vəzifəsinə Ramiz Balabəy oğlu Tağıyev seçilmişdir.
MƏSQ VT-nin şöbə müdiri Nadir İsmayılov qarşıda duran vəzifələrdən danışıb, yeni seçilən heyətə müvəffəqiyyətlər arzulayıb.
