Qızılağac ərazisində şəhid Laçın Qurbanovun adını daşıyan küçəyə baxış keçirilib, şəhid ailəsi ziyarət olunub
Masallı rayonunda sosial infrastrukturun yaxşılaşdırılması, kənd və qəsəbədaxili yolların abadlaşdırılması istiqamətində tikinti-quruculuq işləri davam etdirilir. Növbəti belə abadlıq tədbiri rayonun Qızılağac kəndində həyata keçirilib.
Masallı Rayon İcra Hakimiyyəti tərəfindən görülən işlər çərçivəsində şəhid Laçın Qurbanovun adını daşıyan küçəyə yeni asfalt örtüyü döşənib. Ümumi uzunluğu 230 metr olan küçədə aparılan asfaltlanma işləri sakinlərin rahat və təhlükəsiz hərəkətinin təmin olunmasına, nəqliyyat vasitələrinin gediş-gəlişinin yaxşılaşdırılmasına xidmət edir.
Masallı Rayon İcra Hakimiyyətinin başçısı Araz Əhmədov əraziyə baxış keçirərək görülən işlərlə tanış olub. Baxış zamanı asfalt örtüyünün keyfiyyəti, görülən işlərin nəticələri və ərazidə gələcəkdə həyata keçirilməsi nəzərdə tutulan abadlıq tədbirləri barədə müzakirələr aparılıb.
Qeyd olunub ki, rayon ərazisində sosial infrastrukturun yenilənməsi, yaşayış məntəqələrində yol və küçələrin abadlaşdırılması istiqamətində işlər mərhələli şəkildə davam etdirilir.
Baxışdan sonra rayon rəhbəri şəhid Laçın Qurbanovun anası Gülqədəm Qurbanovanı ziyarət edib, onun səhhəti və ailənin qayğıları ilə maraqlanıb.
Görüş zamanı şəhid ailəsinə göstərilən diqqət və qayğıdan məmnunluq ifadə olunub. Şəhid ailəsi və kənd sakinləri şəhidlərin xatirəsinin daim uca tutulmasına, göstərilən yüksək diqqət və qayğıya görə Azərbaycan Respublikasının Prezidenti İlham Əliyevə, Birinci vitse-prezident Mehriban Əliyevaya və rayon rəhbərliyinə minnətdarlıqlarını bildiriblər.
