Masallı rayonunda təhsil işçilərinin konfransı keçirilib

27-08-2026, 23:30
Siyasət

27 avqust 2026-cı il tarixində Masallı rayon Heydər Əliyev Mərkəzində yeni tədris ilinin başlanması ilə əlaqədar Masallı rayon təhsil işçilərinin konfransı keçirilib.

Əvvəlcə iştirakçılar Azərbaycan xalqının Ümummilli Lideri, müstəqil Azərbaycan dövlətinin qurucusu və memarı Heydər Əlirza oğlu Əliyevin abidəsini ziyarət edərək önünə tər gül dəstələri düzüb, dahi şəxsiyyətin əziz xatirəsini ehtiramla yad ediblər.

Konfransda Masallı Rayon İcra Hakimiyyətinin başçısı Araz Əhmədov, Lənkəran-Astara Regional Təhsil İdarəsinin müdir müavini Rəhim Rəhimov, Masallı Rayon Təhsil Sektorunun müdiri Elman Rzayev, rayon üzrə ümumtəhsil məktəblərinin müəllim və rəhbər işçiləri iştirak ediblər.

Tədbir Ulu Öndər Heydər Əliyevin, eləcə də Azərbaycanın suverenliyi və ərazi bütövlüyü uğrunda canlarından keçmiş şəhidlərin əziz xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlayıb.

Masallı Rayon İcra Hakimiyyətinin başçısı Araz Əhmədov çıxış edərək rayonun ümumtəhsil məktəblərinin müəllim və rəhbər işçilərini 2026–2027-ci tədris ilinin başlanması münasibətilə təbrik edib, hər birinə möhkəm cansağlığı, fəaliyyətlərində uğurlar, yüksək nailiyyətlər və yeni yaradıcılıq əzmi arzulayıb.

Konfransın əsas məqsədinin yeni tədris ilində ümumtəhsil məktəbləri qarşısında duran əsas vəzifələri müəyyənləşdirmək, ötən tədris ilinin nəticələrini təhlil etmək, təhsilin keyfiyyətinin yüksəldilməsi istiqamətində görüləcək işləri müzakirə etmək və qarşıya qoyulan hədəflərlə bağlı fikir mübadiləsi aparmaq olduğunu bildirib.

Qeyd olunub ki, məktəblərdə təlim-tərbiyə prosesinin səmərəli təşkili, şagird nailiyyətlərinin yüksəldilməsi, müəllimlərin peşəkarlıq səviyyəsinin artırılması, müasir təlim metodlarından və rəqəmsal texnologiyalardan istifadənin genişləndirilməsi, məktəb-valideyn əməkdaşlığının gücləndirilməsi, həmçinin şagirdlərin təhlükəsiz və sağlam təhsil mühitində inkişafının təmin edilməsi qarşıda duran əsas vəzifələrdəndir.

Ötən tədris ilinin ilkin nəticələrinə əsasən, Masallı rayonunun ümumtəhsil məktəblərindən 850 məzun ali məktəblərə qəbul olub. Ali məktəblərə qəbul olunan məzunlardan 28 nəfəri 600 baldan, 66 nəfəri isə 500 baldan yuxarı nəticə göstərib. 500 baldan yuxarı nəticə göstərən məzunların 38-ni, 600 baldan yuxarı nəticə göstərənlərin isə 11-ni qızlar təşkil edib.

Bədəlan kənd tam orta məktəbinin məzunu Məmmədova Fəridə Qürbət qızı 682 bal toplayaraq rayon üzrə ən yüksək nəticəni göstərib və IV ixtisas qrupu üzrə Azərbaycan Tibb Universitetinə qəbul olub.

Eyni zamanda, cari ildə keçirilən Respublika Fənn Olimpiadalarında Masallı şəhər İ.Zülalov adına 5 nömrəli tam orta məktəbin XI sinif şagirdi Bəşirova Mahirə Rövşən qızı tarix fənni üzrə qızıl, Ərkivan qəsəbə Z.Nəcəfov adına 2 nömrəli tam orta məktəbin X sinif şagirdi Cəlallı Hikmət Cavid oğlu isə tarix fənni üzrə gümüş medal qazanıb.

Konfransda Lənkəran-Astara Regional Təhsil İdarəsinin müdir müavini Rəhim Rəhimov çıxış edərək Masallı rayonunda təhsil sahəsində əldə olunan uğurlardan danışıb, yeni tədris ilinin başlanması münasibətilə müəllimləri təbrik edərək onlara uğurlar arzulayıb.

Masallı Rayon Təhsil Sektorunun müdiri Elman Rzayev rayonun ümumtəhsil məktəblərində 2025–2026-cı tədris ilinin nəticələri ilə bağlı hesabat məruzəsi ilə çıxış edib.