Masallı RİH Başçısı 04.12.2024-cü il tarixdə Sığdaş ərazisinin sakinləri ilə görüşdü
04 dekabr 2024-cü il tarixində Masallı Rayon İcra Hakimiyyətinin Başçısı cənab Araz Əhmədov vətəndaşlarla növbəti səyyar görüş-qəbulunu Sığdaş ərazisinin Xanalıyan kəndində keçirmişdir.
Belə ki, Masallı Rayon İcra Hakimiyyətinin Başçısı Araz Əhmədov qəbula gələnləri salamlamış, ərazinin tarixi, ziyalıları, ağsaqqalları, mədəniyyəti, məşğuliyyəti və sosial iqtisadi inkişafı barədə çıxış edərək səyyar görüş-qəbulunu açıq elan etmiş, sonra sözü Masallı RİHB aparatının Sənədlərlə və vətəndaşların müraciətləri ilə iş şöbəsinin müdiri Elvin Fəttayevə verərək rayon rəhbəri ilə ötən görüş zamanı vətəndaşların müraciətlərinin həlli vəziyyəti və ərazidə görülmüş işlər barədə məlumat verməsini istəmişdir.
Aparatın Sənədlərlə və vətəndaşların müraciətləri ilə iş şöbəsinin müdiri Elvin Fəttayev ötən səyyar-görüş qəbulu barədə çıxış edərək bildirmişdir ki, ərazinin Babaküçə kəndində keçirilmiş qəbul zamanı 4 vətəndaş tərəfindən 4 müraciət edildiyi, müraciətlərin 2-nin müsbət həll olunduğu, 1 müraciətə qanunamüvafiq cavab verildiyi və 1 müraciətlə bağlı iş aparıldığını bildirmişdir.
Şöbə müdiri ərazidə görülmüş işlər barədə məlumat verərək qeyd etmişdir ki, Şəhid ailələri, imtiyazlı şəxslərə və yardıma ehtiyacı olan vətəndaşlara məişət, kommunal və digər problemlərinin həlli ilə bağlı köməklik göstərilmiş, Sığdaş kənd dini icması tərəfindən şəhid Amid Salayev adına küçəyə 100 metr məsafədə asfalt örtüyü döşənmiş, I Qarabağ Müharibəsi əlili Təhmasib Bəşirovun evinə gedən 100 metr yola çınqıl tökülərək hamarlanmış, Vətən Müharibəsi əlili Ağasəlim Mirzəyevin həyətyanı torpaq sahəsində hamarlanma işləri aparılmış, Xanalıyan kəndində şəhid bulağının önündə hərəkətə maneə yaradan qaz xəttinin yeri dəyişdirilmiş və Şəhid Vurğun Əkbərovun ailəsinin yaşadığı evə 200 metr məsafədən içməli su xətti çəkilmişdir.
Ərazidə 6 km uzunluğunda yola çınqıl tökülərək hamarlanmış, 1,5 km məsafədə Babaküçə-Qodman yoluna qreyder verilmiş, 1,1 km məsafədə kənddaxili yol genilədirilmiş və yolda yaranmış çalalar asfalt materialı ilə cari təmir olunmuşdur. Sığdaş ərazisində 2 ədəd transformator təmir olunmuş və 28 ədəd yararsız elektrik dirəyi yenisi ilə əvəz olunmuş, 2 km-ə yaxın gecə işıqlandırılması sistemi qurulmuşdur. Ərazidə ümumilikdə 1500 metr suaparıcı kanal təmizlənmişdir. GPON lahiyəsi üzrə “Aztelekom” İB və “CityNet” MMC şirkətləri tərəfindən əraziyə yeni internet xətti çəkilərək əhalinin istifadəsinə verilmiş, Xanalıyan kənd sakinləri tərəfindən məscidin divarları təmir edilərək həyətinə tamet döşənmiş və məscid təbii qazla təmin olunmuş, Babaküçə kənd sakinləri tərəfindən məscidin ətrafındakı hasar bərpa olunmuş, daxili və xarici divarları təmir olunmuş və məscidə 2 ədəd kondisoner quraşdırılmışdır. Sığdaş ərazisində “Yaşıl dünya naminə həmrəylik ili” çərçivəsində 1000 ədədə yaxın ağac əkilmişdir.
Sonra rayon rəhbəri qəbula gələn vətəndaşları narahat edən məsələlərlə bağlı müraciətlərini dinləmiş və qəbul zamanı çıxış edən vətəndaşların müraciətinə həssaslıqla yanaşaraq qaldırılan məsələləri qeydiyyata alıb nəzarətə götürmüş və həlli istiqamətində müvafiq qurumlara tapşırıqlar vermişdir.
Masallı Rayon İcra Hakimiyyətinin Başçısı cənab Araz Əhmədov səyyar-görüş qəbulunu yekunlaşdıraraq rayonda vətəndaş müraciətlərinin daim diqqətdə saxlanıldığını bildirmişdir.
