Masallıda 20 yanvar faciəsinin 35-ci ildönmü anıldı
20 yanvar 2025-ci il tarixdə Masallı şəhər “Qəhrəmanlar Parkı-Şəhidlər abidə kompleksi”ndə 20 yanvar faciəsinin 35-ci ildönümü ilə əlaqədar ümumrayon anım mərasimi keçirilib.
Səhər saatlarından başlayaraq ziyarətə gələn minlərlə rayon sakinini bir amal birləşdirirdi: Azadlığımız, müstəqilliyimiz uğrunda canından keçənlərin xatirəsini yad etmək, onların haqq işinin müdafiəçisi olduğunu bildirmək.
Anım mərasimində Masallı Rayon İcra Hakimiyyətinin Başçısı Araz Əhmədov, hüquq-mühafizə orqanları, idarə, müəssisə, təşkilat rəhbərləri və əməkdaşları, şəhid ailələri, ağsaqqallar, ziyalılar, məktəblilər, müharibə veteranları və ictimaiyyət nümayəndələri 20 Yanvar şəhidlərinin abidəsi önünə tər qərənfillər düzərək şəhidlərin ruhunu ehtiramla yad ediblər.
Eyni zamanda, rayon ərazisində matəm əlaməti olaraq Dövlət Bayrağı endirilib, Bakı vaxtı ilə saat 12:00-da rayonun bütün ərazilərində şəhidlərin xatirəsi bir dəqiqəlik sükutla yad edilib, nəqliyyat vasitələrində səs siqnalları verilib.
