Masallıda Məhərrəm ayı ilə əlaqədar dəyirmi masa

03 iyul 2025-ci il tarixdə Masallı Rayon İcra Hakimiyyətində Məhərrəm ayı ilə əlaqədar dəyirmi masa keçirilmişdir.

Tədbiri giriş sözü ilə açan Masallı Rayon İcra Hakimiyyətinin başçısı Araz Əhmədov, dövlət-din münasibətlərinin yüksək səviyyəsinin təməlini qoyan,  Ulu Öndər Heydər Əliyevin milli-mənəvi dəyərlərə hər zaman diqqət və qayğı ilə yanaşdığını, bu ənənənin dövlətimizin başçısı Cənab İlham Əliyevin həyata keçirdiyi tədbirlər sayəsində ölkəmizin inkişafına böyük töhfə verdiyini vurğulamışdır. 

Rayon rəhbəri ölkəmizin hər yerində olduğu kimi Masallı rayonunda da Məhərrəm ayı ilə əlaqədar dini ayin və mərasimlərin yerinə yetirilməsi üçün şəraitin yaradıldığını bildirmiş, sülh və əmin-amanlıq ayı kimi qəbul edilən Məhərrəm ayı ərzində ibadət ocaqlarında ictimai asayişə riayət olunmaqla, təziyə məclislərində Kərbəla şəhidləri ilə yanaşı Vətənimiz uğrunda canlarını qurban vermiş qəhrəman övladlarımızın da əziz xatirəsinin ehtiramla anılmasını, moizə və xütbələrdə vətən təəssübü, milli və dövlət mənafelərimizin uca tutulmasını qeyd etmişdir.

         

Tədbirdə çıxış edən  Masallı Rayon Polis şöbəsinin rəisi Azay Ağayev və Dövlət Təhlükəsizliyi  Xidmətinin Masallı Rayon  şöbəsinin rəisi Elçin Xələfov Məhərrəm ayı ilə bağlı tədbirlərin mövcud  qanunvericilik çərçivəsində keçirilməsinin zəruriliyini diqqətə çatdırmışlar.

 Qafqaz Müsəlmanları İdarəsinin Masallı rayonu üzrə Qazısı və Qazılar şurasının üzvü Rəşid Talıbov tədbirdə çıxış edərək məhərrəmlik mərasimlərində hər kəsi QMİ-nin Qazılar Şurasının müvafiq fətvasının tələblərinə ciddi riayət etməyi tövsiyə edərək, zəncir vurub baş yarmağın, bədənə əziyyət verməyin dində bəyənilmədiyini və  bunun əvəzinə qanvermə aksiyalarında fəal iştirak etməyin daha humanist hərəkət olduğunu bildirmişdir.