Masallı DAİM-də dəyirmi masa
30 iyul 2025-ci il tarixdə Masallı Dövlət Aqrar İnkişaf Mərkəzində Masallı Rayon İcra Hakimiyyətinin təşkilatçılığı, Masallı DAİM, Masallı Rayon Bitki mühafizə və fumiqasiya mərkəzi, Masallı Rayon Heyvan Sağlamlığı və Baytarlıq Xidmətləri İdarəsinin dəstəyi ilə "Konstitusiya və Suverenlik İli"nə həsr olunmuş “Ümummilli Lider Heydər Əliyev müstəqil Azərbaycan Konstitusiyasının müəllifidir” mövzusunda dəyirmi masa təşkil olunmuşdur.
Tədbiri giriş sözü ilə açan Masallı Rayon İcra Hakimiyyəti başçısı aparatının Sosial-iqtisadi inkişafın təhlili və proqnozlaşdırılması şöbəsinin müdir müavini Niyazi Bağırov çıxışında suveren Azərbaycanın memarı və qurucusu Ulu Öndər Heydər Əliyev tərəfindən 1995-ci il noyabrın 12-də imzalanmış Fərmanla Azərbaycan Respublikasının ilk Konstitusiyasının qəbul olunması ilə ölkəmizdə genişmiqyaslı qanunvericilik və institusional islahatların əsasının qoyulduğunu qeyd etmişdir.
Azərbaycan Respublikasının Prezidenti cənab İlham Əliyev tərəfindən 2025-ci ilin Azərbaycanda "Konstitusiya və Suverenlik ili" elan edilməsi, ölkəmizin hüquqi dövlət quruculuğu sahəsində və suverenliyin daha da möhkəmləndirilməsi istiqamətində atılacaq addımların davamı kimi mühüm əhəmiyyət daşıdığını, eyni zamanda, İkinci Qarabağ müharibəsində əldə olunmuş tarixi Zəfər və 2023-cü il sentyabrın 19-20-də həyata keçirilmiş lokal xarakterli antiterror əməliyyatı nəticəsində ölkəmizin ərazi bütövlüyünün və suverenliyinin tam bərpa edildiyini, Azərbaycan Konstitusiyasının hüquqi qüvvəsinin bütün ərazilərdə bərqərar olduğunu və Dövlət Bayrağımızın əzəli torpaqlarımızda əzəmətlə dalğalandığını diqqətə çatdırmışdır.
Sonra çıxış edən Masallı Dövlət Aqrar İnkişaf Mərkəzinin rəis müavini Eldəniz Musalı bildirmişdir ki, ilk Konstitusiyanın milli dövlətçilik tarixində müstəsna əhəmiyyəti nəzərə alınaraq, Ulu Öndər Heydər Əliyev tərəfindən imzalanan 1996-cı il 1 noyabr tarixli Fərmana əsasən, hər il noyabrın 12-si Konstitusiya Günü kimi qeyd edilməyə başlanıb. 1995-ci ildə Əsas Qanunun qəbul edilməsi müstəqillik tariximizin ən vacib hadisələrindən biri olmaqla yanaşı, dövlətçiliyimizin möhkəmləndirilməsi baxımından çox mühüm ictimai-siyasi hadisə kimi qiymətləndirilməlidir. Yeni Konstitusiyanın qəbulu eyni zamanda, ölkəmizin inkişafının prinsipcə tamamilə yeni mərhələyə qədəm qoymasının göstəricisi olmaqla, müstəqillik illərində əldə olunan nailiyyətlərin hüquqi fundamenti qismində çıxış edib.
Daha sonra çıxışçılar Bitki mühafizə və fumiqasiya mərkəzinin rəisi Sakit Məmmədov, Heyvan Sağlamlığı və Baytarlıq Xidmətləri İdarəsinin Epizotik baytar həkimi Dəmir Təhməzov Ümummilli lider Heydər Əliyevin Azərbaycan tarixində təkrarolunmaz rəhbər, qüdrətli dövlət başçısı, fədakar insan, ali liderlik keyfiyyətləri ilə dünyanın siyasi elitasının ən uca zirvəsində qərarlaşan nəhəng şəxsiyyət olması, ikinci dəfə siyasi hakimiyyətə gəlişi ilə Azərbaycan dövlətçiliyini və bütün bir xalqı məhv olmaq təhlükəsindən xilas etməsi, onun qətiyyətli fəaliyyəti, müdrik siyasəti nəticəsində ölkəmizdə qısa müddət ərzində siyasi sabitliyin təmin edilməsi, iqtisadiyyatda, o cümlədən kənd təsərrüfatında və digər sahələrdə yaranmış böhranların aradan qaldırılması və bundan sonra inkişaf mərhələsinin başlanmasını qeyd etmişlər.
