Masallıda rayon rəhbərinin şəhid ailələri ilə növbəti görüşü - 29.12.2025
Masallı Rayon İcra Hakimiyyətinin başçısı tərəfindən rayon ərazisində şəhid ailələri, müharibə əlilləri və iştirakçıları daim diqqətdə saxlanılır, onların qayğıları ilə mütəmadi maraqlanılmaqla yaranmış çətinliklərin aradan qaldırılması istiqamətində mühim adımlar atılır.
29 dekabr 2025-ci il tarixdə Masallı Rayon İcra Hakimiyyətinin başçısı Araz Əhmədovun “Dünya Azərbaycanlıların Həmrəylik Günü” və Yeni il münasibətilə şəhid ailələri ilə görüşmüşdür.
Tədbirdə Masallı Rayon İcra Hakimiyyətinin başçısı Araz Əhmədov, RİHB aparatının əməkdaşları, hüquq mühafizə orqanları, idarə, müəssisə, təşkilat rəhbərləri, şəhid ailələri, din xadimləri və ictimaiyyət nümayəndələri iştirak etmişlər.
İlk öncə Ulu Öndər Heydər Əliyevin, Azərbaycan Respublikasının suverenliyi və ərazi bütövlüyü uğrunda canından keçən şəhidlərimizin əziz xatirəsi 1 dəqiqəlik sükutla yad edildi.
Azərbaycanın ərazi bütövlüyü uğrunda şəhid olanların yaxınları ilə görüşən Araz Əhmədov tədbiri giriş sözü ilə açaraq, dövlətimizin şəhid ailələrinə göstərdiyi diqqət və qayğıdan danışıb, qeyd edib ki, 44 günlük Vətən müharibəsi Azərbaycan xalqının şanlı zəfər tarixidir. Birinci Qarabağ, Vətən müharibəsi və Antiterror əməliyyatlarında qəhrəmanlıq göstərərək qanı ilə tarix yazan igid oğullarımızın adları Azərbaycan xalqının hər bir fərdinin qəlbində yaşayacaq. Əbədiyyətə qovuşan şəhidlərimizin əziz xatirələri hər zaman ehtiramla yad ediləcəkdir.
Masallı Rayon İcra Hakimiyyəti başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Qəşəm Hadıyev çıxışında qeyd edib ki, Masallı rayonunda 256 şəhid, 260 müharibə əlili, 1984 müharibə iştirakçısı vardır.
Şəhidlərimizin ailələri mütəmadi olaraq ziyarət edilir və sosial problemlərinin həlli istiqamətində işlər görülür. Şəhid ailələrinin üzvləri, müharibə ilə əlaqədar əlilliyi olan şəxslər və müharibə iştirakçıları dərman preparatları ilə təmin olunması daim diqqətdə saxlanılır.
Əlamətdar günlərdə şəhid ailələrinə və müharibə ilə əlaqədar əlilliyi təsdiq edilmiş şəxslərə baş çəkilir, ehtiyacı olanlara maddi yardımlar verilir, Rayon İcra Hakimiyyəti tərəfindən keçirilən tədbirlərə dəvət olunurlar. 2025-ci ilin 27 sentyabr Anım günündə və 12 dekabr Ümumilli lider Heydər Əliyevin anım günündə ehsan süfrəsi təşkil edilərək şəhid ailə üzvləri və bir qrup müharibə iştirakçıları dəvət edilmişdir.
Şəhid ailələrinin sosial məişət şəraitinin yaxşılaşdırılması məqsədi ilə Rayon İcra Hakimiyyəti başçısı daim onlarla görüşür, qayğıları ilə maraqlanır, onların problemləri dinlənilərək həlli istiqamətində işlər görülür. Eyni zamanda müraciətləri əsasında aidiyyəti şöbələr tərəfindən şəhid ailələrinin yaşadıqları ünvanlarda görüşərək müraciətlərinin həlli istiqamətində işlər görürlər.
Şəhid adları daşıyan küçələrə asfalt örtük vurularaq əsaslı təmir edilir. 2025-ci ilin əvvəlindən hazırki dövrədək 16 şəhid adını daşıyan küçələrə və şəhid ailələrinin yaşadıqları küçələrə ümumilikdə 22200 kvadrat metr (310000 manat) dəyərində asfalt örtük vurulmuş və asfalt olunmayan şəhid küçələrinə 24000 manat dəyərində qum-çınqıl tökülərək cari təmir edilmişdir. Ümumilikdə 96 şəhidin adına olan küçələrə və ailənin yaşadığı küçələrə 3 il 5 ay ərzində uzunluğu 36 km olmaqla 125000 kv.m (1.510.000 manat) dəyərində asfalt örtüyü vurulmuş və bu prosses davam etdirilir.
İki müharibə əlilinin tikməkdə olduqları fərdi yaşayış evlərinə tikinti materialları verilmişdir. 3 şəhid ailəsinin evində təmir işləri görülür və iki şəhid ailəsi üçün fərdi yaşayış evinin tikintisi davam etdirilir. Bundan əlavə olaraq bildirmək istəyirəm ki, bu il 17 şəhid ailəsinə və qazilərə müəyyən tikinti materialları ilə təmin olunmasına köməklik edilmişdir.
2025-ci ilin əvvəlindən hazırki dövrə kimi şəhid ailələrinə, müharibə ilə əlaqədar əlilliyi müəyyən edilmiş şəxslərə, müharibə iştirakçılarına ümumilikdə 56964 manat məbləğində maddi yardım edilmişdir.
Əlavə olaraq bildirmək istəyirəm ki, Vətən müharibəsi bitdikdən sonra bu günə kimi imtiyazlı şəxslərə ümumilikdə 478962 manat məbləğində maddi yardımlar edilmişdir.
Daha sonra tədbirdə Şəhid valideynlərindən Vahid İsgəndərov və Leyla Əliyeva, Ağsaqqallar şurasının sədri Ələşrəf Niftiyev, Qafqaz Müsəlmanlar Şurasının üzvü Ağarəşid Talıbov və Masallı şəhər cümə məscidinin axundu Məftun Hüseynov çıxış etmişdir.
Tədbirin sonunda şəhid ailələrinin müraciətləri dinlənilmiş və rayon rəhbəri tərəfindən həlli istiqamətində tapşırıqlar verilmişdir.
Şəhid ailə üzvləri onlara göstərilən diqqət və qayğıya görə Azərbaycan Respublikasının Prezidenti Cənab İlham Əliyevə, Birinci Vitse-Prezident Mehriban xanım Əliyevaya, rayon rəhbərliyinə minnətdarlıqlarını ifadə ediblər.
