Masallı “Region idmançılarının I festivalı”na ev sahibliyi etdi
04 mart 2026-cı il tarixdə Masallı şəhər Heydər Əliyev Parkında Masallı Rayon İcra Hakimiyyəti və Lənkəran-Astara Regional Gənclər və İdman İdarəsinin birgə təşkilatçılığı ilə “5 Mart-Bədən tərbiyəsi və idman günü” münasibətilə “Region idmançılarının I festivalı” və idman paradı keçirilmişdir.
Festivalda Masallı Rayon İcra Hakimiyyətinin Başçısı Araz Əhmədov, Lənkəran-Astara Regional Gənclər və İdman İdarəsinin rəisi Teymur Babazadə, Lənkəran-Astara Regional Təhsil İdarəsinin müdir müavini Rəhim Rəhimov və digər rəsmi şəxslər, həmçinin Masallı, Cəlilabad, Lənkəran, Lerik, Yardımlı, Astara rayonlarının idmançıları iştirak etmişdir.
Öncə tədbir iştirakçıları müstəqil Azərbaycan dövlətinin qurucusu və memarı, Azərbaycan Xalqının Ümummilli Lideri Heydər Əlirza oğlu Əliyevin abidəsi qarşısına tər gül dəstələri düzərək dahi şəxsiyyətin əziz xatirəsini ehtiramla yad etdilər.
Daha sonra festivalda iştirak edən rayonların qələbə əzmli, peşəkar idmançıları və region komandaları tədbir iştirakçılarına təqdim edilmişdir.
Sonra tədbirin ev sahibi, Masallı Rayon İcra Hakimiyyətinin başçısı cənab Araz Əhmədov təbrik nitqi ilə çıxış edərək bildirdi ki, martın 5‑i Azərbaycanda idmanın, sağlam həyat tərzinin və gənc nəslin fiziki inkişafının təbliği üçün çox böyük əhəmiyyətə malikdir. Bu əlamətdar günün təsis edilməsi Azərbaycan Respublikasının Prezidenti cənab İlham Əliyevin 2005‑ci il 4 mart tarixli Sərəncamına əsaslanır və ölkəmizdə idmanın geniş vüsət alması üçün mühüm təkan olmuşdur.
Məhz bu tarixdə — 1995‑ci il martın 5‑də Ulu Öndər Heydər Əliyev Bakı İdman Sarayında dünya və Avropa çempionatlarının qalibləri ilə görüşərək idmanın inkişafı üçün yeni strategiyanın əsasını qoymuş, İdman Fondunu təsis etmişdir. Bu günü biz həm də milli idman hərəkatının inkişaf tarixinin bir parçası kimi qeyd edirik.
Bədən tərbiyəsi və idman – yalnız fiziki qüvvə və bacarıq deyil, eyni zamanda intizam, komanda ruhu, sağlam həyat tərzi və mənəvi cəhətdən güclü vətəndaşların formalaşması deməkdir. Bu gün biz idmana başlayan, idmanla məşğul olan və yarışlarda rayonumuzu, ölkəmizi layiqincə təmsil edən gənc idmançılarımızla fəxr edirik.
Bədən tərbiyəsi və idman – yalnız fiziki qüvvə və bacarıq deyil, eyni zamanda intizam, komanda ruhu, sağlam həyat tərzi və mənəvi cəhətdən güclü vətəndaşların formalaşması deməkdir. Bu gün biz idmana başlayan, idmanla məşğul olan və yarışlarda rayonumuzu, ölkəmizi layiqincə təmsil edən gənc idmançılarımızla fəxr edirik.
Sonra çıxış edən Lənkəran-Astara Regional Gənclər və İdman İdarəsinin rəisi Teymur Babazadə, Lənkəran-Astara Regional Təhsil İdarəsinin müdir müavini Rəhim Rəhimov bildirmişdir ki, bu gün keçirilən İdman paradı və I Regional İdman Festivalı bir daha göstərdi ki, Masallı rayonu idman ənənələrinə sadiqdir və regionda idmanın inkişafı istiqamətində mühüm addımlar atılır.
İdman sağlam cəmiyyətin formalaşmasının əsas şərtlərindən biridir. Gənclərimizin idmana cəlb olunması onların fiziki və mənəvi inkişafına, sağlam və vətənpərvər ruhda yetişməsinə xidmət edir.
Rəsmi hissənin sonunda rayonun idman sahəsində səmərəli fəaliyyəti, sağlam həyat tərzinin təbliği, yüksək idman nailiyyətlərinin əldə olunmasına mühüm töhvə verməsinə görə İcra Hakimiyyəti Başçısının müvafiq Sərəncamı ilə təltif olunmuş bir qrup məşqçi-müəllim və idmançıya rayon rəhbəri Araz Əhmədov tərəfindən Fəxri Fərman təqdim edildi.
Masallı Rayon İcra Hakimiyyəti və Lənkəran-Astara Regional Gənclər və İdman İdarəsinin birgə təşkilatçılığı ilə “5 Mart-Bədən tərbiyəsi və idman günü” münasibətilə keçirilən “Region idmançılarının I festivalı” və idman paradı idmançıların müxtəlif idman növləri üzrə nümunəvi çıxışlar təqdim etməsi ilə yekunlaşdı.
