Masallının təsərrüfat sahələrində

20-04-2021, 17:18
Aqrar

SƏRÇUVARDA POMİDOR ƏKİLİR

Hər il sahələrdən bol məhsul götürən Sərçuvar fermerləri bu il də uğurları artırmaq üçün səylərini birləşdiriblər. Kənd ərazi nümayəndəsinin müavini Ülfət Abdullayevdən aldığımız məlumata görə fermerlər pomidor əkininə start veriblər.
Qısa müddətdə 30 hektardan çox sahəyə keyfiyyətli şitil köçürülmüşdür.
Susevər bitkiyə hər gün qayğı göstərilir.

KARTOFÇULUQ GƏLİRLİ SAHƏDİR

Təsərrüfatın ən sərfəli sahəsi olan kartofçuluq Masallı rayonunun iqtisadiyyatında mühüm rol oynayır. Hər il olduğu kimi bu il də Masallı fermerləri bu sahəyə önəm verir, kartofçuluğu daha da inkişaf etdirirlər.
Masallı Statistika İdarəsindən aldığımız məlumatda göstərilir ki, fermerlər aprelin 1-nə kimi 839,1 hektar sahədə kartof əkmişlər. Bu sahəyə diqqət yetirən Təklə kəndi ərazisində 300 hektar, Təzə Alvadı kəndində 200 hektar, Xırmandalı kəndi ərazisində 70 hektar, Köhnə Alvadı kəndində 35 hektar sahədə kartof əkilmişdir.

Bostan sahələri genişləndirilir

Masallı rayonunun Xırmandalı, Təklə və Qarğalıq ərazilərinin fermerləri bu il bostan sahələrini daha da genişləndirməyi qərara alıblar. Həmin ərazilərdə indiyə kimi 215 hektar sahədə örtük altında yemiş və qarpız əkilib. Sahələrdə hər gün bitkilər suvarılır, havalandırılır.
Qeyd etmək yerinə düşər ki, bostan sahələri bol günəş və vaxtında sulanan torpaqlarda böyüyür. Əkindən sonra cərgələr və su kanalları açılır. Bostan sahələrində lazım olan şəraiti yaradıb, tələb olunan qulluğu göstərdikdə bol məhsul götürmək mümkündür.

Qızılağacda əkinə hazırlıq işləri

Qızılağac kənd bələdiyyəsinin sədri Şamil Məmmədovun verdiyi məlumata görə hazırda ərazidə yaz-tarla işlərinə hazırlıq işləri yüksək sürətlə həyata keçirilir. Belə ki, tarlalarda əkin sahələrinin suvarılması ilə bağlı su paylayıcı kanalların qazılması və təmizlənməsi işləri sürətlə davam etdirilir.

Zəfərançılığa diqqət artır

Rayonumuzda son illərdə zəfərançılığa diqqət artır. Ətirli ədviyyat olan “Cənub zəfəranı” əsasən şəxsi həyətyanı sahələrdə yetişdirilir.
Masallı Rayon Statistika İdarəsindən aldığımız məlumata görə bu il 7,5 hektar sahədə zəfəran toxumu əkilmişdir.
Belə ki, Mahmudavar, Xırmandalı, Sığdaş, Qızılavar ərazilərinin hər birində bir hektar sahədə zəfəran yetişdirilir. Əkin davam edir.

Mahmudavarda tezyetişən naringi tingləri əkilib

Mahmudavar bələdiyyəsinin sədri Əfqan Babayevin verdiyi məlumatda bildirilir ki, kənd sakini Qoşqar Məmmədov bu günlərdə bir hektar sahədə Astara rayonundan gətirdiyi tezyetişən naringi tingini torpağa köçürmüşdür.
Hazırda əkin sahəsini suvarmaq məqsədilə tədbirlər görülür.

Akif AĞAYEV,
“Yeni həyat”,
www.yeniheyet.az