Rusiyanın ən yaxşı cərrahı Masallıdandır
- 5-12-2025, 23:00
- Maraqlı
- 0
- 91
Hər bir azərbaycanlı üçün dünyanın hansı ölkəsində yaşamasından asılı olmayaraq uğur qazanmaq, peşəsinin zirvəsinə yüksəlmək həm şəxsi nailiyyət, həm də xalqımız üçün qürurverici hadisədir.
Bu dəfə sevindirici xəbər Rusiyadan gəldi. Gənc həmyerlimiz öz peşəkarlığı və əzmkarlığı ilə ölkənin ən yüksək tibbi mükafatlarından birinə layiq görülüb. Cərrah-uroloq Rahim Baxşiyev ProDoctorov platformasının ənənəvi ümumrusiya mükafatında “Rusiyanın ən yaxşı cərrahı” nominasiyasının qalibi olub.
Rahim Vahid oğlu Baxşiyev 1988-ci il fevralın 10-da Masallı rayonunun Ərkivan qəsəbəsində anadan olub. O, 1995-ci ildə ailəsi ilə birlikdə Rusiyaya köçərək təhsilini burada davam etdirib və gələcək peşə fəaliyyətini tibb sahəsi ilə bağlayıb.
2010-cu ildə İvanovo Dövlət Tibb Akademiyasını bitirən Rahim Baxşiyev 2010-2012-ci illərdə cərrahiyyə üzrə ordinaturanı uğurla tamamlayıb. Hələ tələbəlik illərindən ictimai fəal olan Rahim 2008-2012-ci illərdə Azərbaycan Gənclər Təşkilatının (AMOR) Rusiyanın İvanovo vilayəti üzrə sədri vəzifəsini icra edib. 2009-cu ildə isə o, “Gənclər ictimai birliyinin lideri” nominasiyası üzrə Rusiya Federasiyası Prezidentinin mükafatına layiq görülüb.
Peşəkar tibbi fəaliyyəti boyunca R.Baxşiyev çalışdığı hər bir tibb müəssisəsində özünü məsuliyyətli və bacarıqlı mütəxəssis kimi göstərib. O, 2013-2014-cü illərdə Yuja Mərkəzi Rayon Xəstəxanasında cərrah, 2014-2019-cu illərdə Lejnevsk Mərkəzi Rayon Xəstəxanasında cərrahiyyə şöbəsinin müdiri, 2019-2022-ci illərdə isə 7 nömrəli Şəhər Klinik Xəstəxanasında cərrah kimi fəaliyyət göstərib.
2022-ci ildən “Life” Tibb Klinikasında cərrah və uroloq olaraq çalışır.
Həmin il o, Krasnodar şəhərinə köçərək burada bir neçə səhiyyə müəssisəsində paralel tibbi fəaliyyətini davam etdirib. Savadı, təcrübəsi və yüksək pasiyent məmnuniyyəti sayəsində Rahim Baxşiyev 2025-ci ildə ProDoctorov ümumrusiya mükafatında “Rusiyanın ən yaxşı cərrahı” adına layiq görülüb. Mükafat Soçi şəhərində keçirilən təntənəli mərasimdə təqdim edilib.
Rahim Baxşiyevin ailəsi də çalışqanlığı və nümunəvi fəaliyyəti ilə tanınır: atası Vahid Lətif oğlu, eləcə də hüquqşünas ixtisaslı qardaşı Ramil fərdi sahibkarlıqla məşğuldur. Anası Nətəvan xanım evdar qadındır. R.Baxşiyev ailəlidir, iki övladı var. O, Rusiyada fəaliyyət göstərən iş adamı, İvanovo vilayətinin Yuja rayonunun fəxri vətəndaşı və deputatı olan həmyerlimiz Əlizamin Əməşovun kürəkənidir.
Bu gün Rahim Baxşiyev yaşadığı regionda ən tanınmış və etibarlı mütəxəssislərdən biri kimi fəaliyyətini uğurla davam etdirir, tibbin müxtəlif sahələrində yeni istiqamətlərin inkişafına mühüm töhfələr verir.
Gənc həmyerlimizin qazandığı bu uğur həm şəxsi nailiyyət, həm də xalqımız üçün qürurverici hadisədir. Ona gələcək fəaliyyətində daha böyük nailiyyətlər, sağlam can, uğurlu əməliyyatlar və davamlı yüksəliş arzulayırıq.
Akif AĞAYEV
