Masallıda kitab təqdimatı – “Nəsillərin görüşü və ya düşüncələr körpüsündə”
- 6-12-2025, 20:25
- Maraqlı
- 0
- 258
Masallıda yazıçı-publisist Ələşrəf Niftiyevin “Nəsillərin görüşü və ya düşüncələr körpüsündə” adlı yeni kitabının təqdimatı keçirilib.
Müəllifin 24-cü kitabı olan bu əsərin təqdimatına yaradıcı insanlar, mədəniyyət işçiləri, ictimaiyyət nümayəndələri və çoxsaylı oxucular qatılıblar.
Rayon Mərkəzləşdirilmiş Kitabxanasında baş tutan tədbir Ulu Öndər Heydər Əliyevin və Vətənimizin bütövlüyü uğrunda canlarından keçən şəhidlərin xatirəsinin bir dəqiqəlik sükutla yad edilməsi ilə başlayıb.
Kitabxana Sisteminin direktoru Zamin Məmmədov tanınmış qələm sahibi, rayon Ağsaqqallar Şurasının sədri Ələşrəf Niftiyevin yeni kitabını yüksək dəyərləndirərək, onun həm ədəbi, həm də milli dəyərlərin təbliği baxımından mühüm rol oynadığını, müəllifin əsərlərinin oxucular tərəfindən böyük maraqla qarşılandığını vurğulayıb.
Kitabın redaktoru, Azərbaycan Jurnalistləri Birliyinin Masallı rayon təşkilatının sədri, yazıçı-publisist Akif Ağayev müəllifin publisistik üslubun səlisliyini bədii dilin dərinliyi ilə birləşdirərək oxucunun düşüncə və hisslərinə təsir etməyi bacardığını bildirib: “80 yaşlı yazar dünyanın bu keşməkeşli dövründə müharibələrin ayırdığı yolları, dağılan ailələri, körpüsüz qalan taleləri, o cümlədən günahsız uşaqların və köməksiz insanların yaşadığı acıları xatırladır.”
Tədbirdə Əməkdar jurnalist, tərcüməçi-yazar Zakir Abbas, “Tərəqqi” medallı veteran jurnalist Əyyub Mehdiyev, Müharibə, Əmək və Silahlı Qüvvələri Veteranları Təşkilatının rayon şöbəsinin sədri Ramiz Tağıyev, yazıçı-publisist və araşdırmaçı Xodaşirin Cəbiyev, AYB üzvü, şair Meysaba Aslanova, Vətən müharibəsi iştirakçısı Cavid Nuri, “Yeni həyat” qəzetinin baş redaktoru Əlihüseyn Şükürov, rayon tarix-diyarşünaslıq muzeyinin direktoru Əntiqə Tağıyeva və kitabxananın əməkdaşı Günay Xəlilova çıxış edərək kitabın yalnız publisistik düşüncənin məhsulu olmadığını, həm də ictimai bir çağırış kimi dəyərləndirildiyini bildiriblər: “Müəllif kitabda oxucunu susmağa deyil, açıq danışmağa səsləyir. Bu əsər ailə üzvləri, xüsusilə də gənclərlə yaşlılar arasında səmimi ünsiyyət və anlayış körpüləri qurmaq üçün vacib bir bələdçidir.”
Çıxışlarda qeyd olunub ki, zəngin həyat təcrübəsinin, insanlara sevgi və qayğının məhsulu olan “Nəsillərin görüşü və ya düşüncələr körpüsündə” kitabı yalnız müəllifin deyil, bütöv bir xalqın yaddaşının və düşüncə dünyasının aynasıdır.
Tədbirin sonunda müəllif iştirakçılara və təşkilatçılara təşəkkürünü bildirib, oxuculara imzalı kitablarını təqdim edib.
Akif VAQİFOĞLU
