Masallıda şəhidlərin xatirəsinin əbədiləşdirilməsi istiqamətində mühüm addım atılıb
- 18-02-2026, 08:20
- Maraqlı
- 0
- 828
17 fevral tarixində Viləş kəndində “Şəhid Qardaşlar” Ev Muzeyinin yaradılması ilə bağlı İctimai Şuranın formalaşdırılması və ilk iclası keçirilib.
Şəhid Nurlan Əsgərli və İntiqam Əsgərli qardaşlarının xatirəsinin əbədiləşdirilməsi məqsədilə yaradılan ev muzeyinin təşkili istiqamətində keçirilən görüşdə ictimai əsaslarla fəaliyyət göstərəcək qurumun təşkilati məsələləri geniş müzakirə olunub. Tədbirdə iştirak edən nümayəndələr muzeyin gələcək fəaliyyəti, cəmiyyət üçün əhəmiyyəti və tarixi-mənəvi dəyərlərin qorunmasında rolu barədə fikir mübadiləsi aparıblar.
İctimai Şuranın ilk iclasında mühüm təşkilati qərarlar qəbul edilib. İclas zamanı Şuranın üzvlərinin tərkibi müəyyənləşdirilib, fəaliyyət prinsiplərini və idarəetmə mexanizmlərini əhatə edən Nizamnamə yekdilliklə təsdiq olunub. Eyni zamanda Şuranın qarşısında duran əsas məqsəd və vəzifələr də konkret şəkildə müəyyən edilib.
Çıxış edənlər bildiriblər ki, muzeyin yaradılması şəhidlərin həyat yolu və qəhrəmanlıq nümunələrinin gələcək nəsillərə çatdırılması baxımından mühüm əhəmiyyət daşıyır. Qeyd olunub ki, belə bir mədəni irs ocağı yalnız tarixi yaddaşın qorunmasına deyil, həm də gənclərin vətənpərvərlik ruhunda tərbiyəsinə, milli-mənəvi dəyərlərin təbliğinə ciddi töhfə verəcək.
İclas zamanı İctimai Şuranın fəaliyyət istiqamətləri də müəyyənləşdirilib. Bu istiqamətlərə muzey ekspozisiyasının elmi və tarixi əsaslarla formalaşdırılması, şəhid ailələri ilə əməkdaşlığın genişləndirilməsi, maarifləndirici və vətənpərvərlik mövzusunda tədbirlərin təşkili, eləcə də muzeyin fəaliyyətinin ictimaiyyətə çatdırılması daxil edilib. Bildirilib ki, muzeyin yaradılması prosesi ictimai dəstək və birgə əməkdaşlıq əsasında həyata keçiriləcək.
Tədbirin sonunda iştirakçılar muzeyin yaradılması və inkişafı istiqamətində birgə fəaliyyətin vacibliyini vurğulayıb, qarşıya qoyulan məqsədlərin həyata keçirilməsi üçün ardıcıl tədbirlərin görülməsi barədə razılığa gəliblər. Vurğulanıb ki, yaradılacaq muzey şəhidlərin qəhrəmanlıq salnaməsinin yaşadılması ilə yanaşı, regionun tarixi irsinin qorunmasına və gələcək nəsillərə ötürülməsinə mühüm töhfə verəcək.
