Masallı Rayon Ağsaqqallar Şurasının yığıncağı keçirildi
- 4-10-2025, 18:29
- Maraqlı
- 0
- 254
Oktyabrın 4-də Masallı Rayon Ağsaqqallar Şurasının yığıncağı keçirildi. Tədbir Ağsaqqallar klubunda “Şuranın Əsasnaməsindən irəli gələn tələblərin yerinə yetirilməsi və qarşıda duran vəzifələr” mövzusunda təşkil olunmuşdu.
Şura sədri Ələşrəf Niftiyev geniş məruzə ilə çıxış edərək, ölkədə ağsaqqallar hərəkatının inkişafı, “Konstitusiya və Suverenlik İli” çərçivəsində rayon şurasının həyata keçirdiyi işlər və yerli ərazilərdə ağsaqqalların apardığı maarifləndirmə tədbirləri barədə ətraflı məlumat verdi.
Azərbaycanın Fəxri Ağsaqqalı Ə.Niftiyev çıxışında həmçinin müasir dünyanın geosiyasi və qloballaşma prosesləri fonunda respublikamızın beynəlxalq nüfuzu, Prezident cənab İlham Əliyevin liderliyi ilə əldə olunan nailiyyətlərdən danışdı. O, rayonda son illər ərzində aparılan abadlıq-quruculuq işlərini, əhalinin məşğulluğunun təmin olunmasını, gənclər arasında vətənpərvərlik ruhunun aşılanmasında ağsaqqalların mühüm rolunu xüsusi qeyd etdi.
Ailə institutunun möhkəmləndirilməsi, cəmiyyətə zidd halların qarşısının alınmasında yaşlı nəslin və ağsaqqalların təsir imkanlarından, eləcə də Cənubi Qafqazda sülh və iqtisadi inkişafa dəstək verilməsinin əhəmiyyətindən bəhs edən sədr, bütün bu məsələlərin birlikdə və koordinasiyalı şəkildə həyata keçirilməsinin dövrün aktual çağırışları sırasında olduğunu vurğuladı.
Müzakirələr zamanı Şuranın Güllütəpə ərazi üzrə nümayəndəsi Məmmədəli Əlinağıyev, AYB-nin üzvü Meysaba Aslanova, Əməkdar jurnalist Zakir Abbas, eləcə də Xırmandalı kəndindən Asif Cəfərov, Təzə Alvadıdan Yavər Yusubov və başqaları əsləndirilən fikirlərlə razılaşaraq, yerlərdə ağsaqqalların fəaliyyətinin daha da gücləndirilməsi istiqamətində görüləcək işlərə dəstək verdiklərini bildirdilər.
Çıxışlarda rayon təşkilatının qabaqcıl təcrübəsi yüksək qiymətləndirildi, gələcək fəaliyyətin də günün tələblərinə uyğun şəkildə davam etdiriləcəyinə əminlik ifadə olundu.
Akif AĞAYEV
