YENİ KİTAB SAYCA İYİRMİ BEŞİNCİDİR...
- 4-11-2025, 16:00
- Maraqlı
- 0
- 152
Hər bir xalqın tarixi onun nəsillərinin həyat səhifələrində yaşanır və bu həyatların bir-birilə qovuşduğu məqamlar insanlıq üçün dəyərli miras yaradır. Nəsillərin görüşü – bu, sadəcə ailəvi bir söhbət deyil, bu, zamanların, düşüncələrin, hisslərin və həyat təcrübələrinin toqquşub-birləşdiyi müqəddəs bir andır. Burada keçmişlə gələcək üz-üzə dayanır və bu qarşılaşma hər iki tərəf üçün səmərəli olur.Uşaqlıq illərində babalarımız və nənələrimizlə keçirdiyimiz anlar bizimçün əsl “nəsillərin görüşü” nümunəsi idi. Onlar bizə yalnız nağıl, bayatı və əhvalatlar danışmırdılar, həm də həyatı anlamağın yollarını öyrədirdilər. Yaşlıların sözlərində ulu nəslin izi, üz cizgilərində isə zamanın sükutu vardı.
Nəsillər arasında fərqli baxışlar və dünyagörüşlər labüddür. Gənclər şübhəsiz, yeniliyə can atır, yaşlılar isə dəyərləri qorumağa çalışır. Bu zaman fikir ayrılıqları qaçılmazdır. Amma əsl hikmət ondan ibarətdir ki, bu fərqlər uçuruma deyil, körpüyə çevrilsin. Gənc insan yaşlıların təcrübəsindən faydalansa, yaşlı nəsil də gənclərin enerjisini və baxışını anlamağa çalışsa, cəmiyyət daha sağlam inkişaf edər.
Müasir dövrdə texnologiya, həyat tərzi, maraqlar və münasibətlər çox dəyişib. Nənələrimizin toxuduğu corabları bu gün maşınlar istehsal edir, əkin sahələrini müasir texnika və robotlar əvəz edir. Amma unutmamalıyıq ki, o corabların, əlcəklərin içində sevgi vardı, qəlb hərarəti və alın tərinin dəyəri vardı. Bunları anlamaq üçün nəsillərin bir araya gəlməsi, bir-birini dinləməsi və sevməsi vacibdir. Üstəgəl səmimi münasibət, isti yanaşma və güzəştə getmək...
Belə görüşlər və dialoqlar bizə tariximizi, mədəniyyətimizi və kimliyimizi xatırladır. Əgər biz bu görüşləri və təmasları itirsək, keçmişlə olan bağımız da qərılar. Gələcək isə keçmişin üzərində qurulmalıdır. Bu baxımdan hər bir ailədə nəsillər arasında dialoq, hörmət və sevgi mühiti davamlı hökm sürməlidir.
Nəsillərin görüşü sadəcə bir masa arxasında oturub çay içmək deyil. Bu, zamanın öyrətdiklərini paylaşmaq, gələcəyi doğru qurmaq üçün birlikdə düşünməkdir. Hər birimiz bu görüşlərə dəyər verməli və onları qoruyub yaşatmalıyıq.
Ədəbiyyat insan ruhunun aynası, cəmiyyətin mənəvi yaddaşıdır. Hər dövrün öz həqiqətləri, öz dəyərləri, öz ağrıları və sevincləri olur.Yazıçı-publisist Ələşrəf Niftiyev növbəti publisistik əsərində oxucunu nəsillər arasında əlaqələrin mahiyyəti, mənəvi dəyərlərin ötürülməsi, ənənə ilə müasirliyin dialoqukimi aktual və dərin mövzularla tanış edir. Müəllif cəmiyyətin sabitliyi və mənəvi bütövlüyü üçün nəsillər arasında qurulan körpünün nə qədər vacib olduğunu vurğulayır.
2025-ci ildə yenidən sevimli oxucuları ilə görüşə gələn müəllif əvvəlki yazılarında olduğu kimi təqdim etdiyi bu kitabda da keçmişlə gələcək arasında tarixi və mənəvi bağların əhəmiyyəti mövzusunda oxucunu düşünməyə sövq edir. O, sadəcə nostalji ilə kifayətlənmir, eyni zamanda keçmişin gənc nəsillərə düzgün formada ötürülməsinin zəruriliyini və yollarını vurğulayır. Ələşrəf Niftiyev göstərir ki, yaşlı nəsil həyat təcrübəsinin daşıyıcısı, gənclər isə yeni düşüncənin və enerjinin daha irəliyə aparıcısıdır. Və bu iki qüvvə bir-birinə möhtacdır.
Əsərin dili sadə, anlaşıqlı, eyni zamanda təsirli və çağırışla doludur. Müəllif həm publisistik üslubun aydınlığını, həm də bədii dilin dərinliyini birləşdirərək, oxucunun həm düşüncəsinə, həm də hisslərinə toxunmağı bacarır. Yerli həyat faktlarından, ailə və cəmiyyət nümunələrindən bacarıqla istifadə etməklə, ədib mövzunu oxucuya daha da yaxınlaşdırır, onu düşünməyə vadar edir.
Ələşrəf Niftiyevin bu kitabı da yalnız publisistik düşüncənin məhsulu deyil, həm də ictimai bir çağırışdır. O, oxucunu susmağa deyil, açıq danışmağa, soruşmağa, dinləməyə və anlamağa çağırır. Bu kitab ailə üzvləri arasında, xüsusən də gənclərlə yaşlılar arasında səmimi təmasların, körpülərin qurulması üçün mühüm bir bələdçidir.
Müəllif kitabda yer alan “Ata borcunun işığında”, “Paslı açarın sirri”, “Ata ocağının hikməti”, “Sənə əsa alacağam”, “Mənim anam ölməyəcək” kimi yazıları ilə oxucunu düşündürməyə, mənəvi dünyamızda iz buraxmağa çağırır.
Bu yazıların hər biri yalnız bir ailə tarixindən, fərdi yaşantıdan bəhs etmir — burada bütöv bir nəsil, xalq, ənənə və yaddaş var. Ata ocağına sədaqət, ana müqəddəsliyi, ailə bağlarının önəmi, zamanla itirilən dəyərlərin qorunması kimi mövzular əsərin əsas xəttini təşkil edir.
Oxucular Ələşrəf müəllimin yeni nəşrində sadə, anlaşılan dillə yazılmış, lakin dərin mənalı hekayələrlə də qarşılaşacaq, bəzən keçmişə boylanacaq, bəzən də bu günün suallarına cavab axtaracaq. Kitab təkcə oxumaq üçün deyil, həm də düşünmək, hiss etmək və dəyərləndirmək üçündür.
Azərbayvan Yazıçılar və Jurnalistlər birliklərinin üzvü Ələşrəf Niftiyevin kitablarının hər biri həyatın içindən gələn, oxucunun qəlbinə toxunan bir çağırışdır — unutmamaq, bağlanmaq, qorumaq və yaşatmaq üçün... Çünki ədib bu əsərində yalnız nəsillərarası əlaqəni deyil, həm də bu əlaqənin cəmiyyətin mənəvi dirəyiolduğunu göstərir. Onun üslubu düşündürür, çağırışları isə oxucunu keçmişə bağlı, amma gələcəyə aydın və sayıq baxışla irəliləməyə səsləyir.
Axı, keçmişin səsi gələcəyin yoluna işıq tutur.
Akif AĞAYEV.
