Bələdiyyə sədri

Həmin gün düşüncələr onu rahat buraxmırdı. Özünü bələdiyyə üzvlüyünə namizəd verəndən sonra üzünə və kənarda söz deyənlər olmuşdu: "Qadın hara, bələdiyyə işi hara", "Ay qız, sən müəllimliyini elə də,
bələdiyyədə nə işin var", "İndi camaatın xəndək, torpaq davasını bu qız yoluna qoyacaq?"

 Daha sonra Rasim müəllimin dediyi sözləri xatırladı. Rayon mərkəzində keçirilən tədbirlərin birində Rasim müəllimlə ayaqüstü söhbətləri olmuşdu. Rasim müəllim: "Tünzalə xanım, eşitmişəm bələdiyyə seçkilərində öz namizədliyini vermisən?" deyə soruşdu. Tünzalə xanım gülümsəyərək: "Düz eşitmisiniz" dedi.

 Rasim müəllim: "Qızım, bax, səni qətiyyən ruhdan salmaq fikrim yoxdur. Sadəcə demək istəyirəm ki, bələdiyyə ağır işdir, böyük məsuliyyət tələb edir. Bir daha fikirləş, götür-qoy et."

  Tünzalə xanım düşüncələrindən ayrıldı və qətiyyətlə öz-özünə qərar verdi: "Yox, fikrim qətidir! Namizəd kimi seçkidə iştirak edəcəyəm. Əgər səs qazanaraq qalib olsam, o zaman fəaliyyətimlə sübut edərəm ki, bələdiyyə necə olmalıdır..."

  Tünzalə xanım namizəd kimi seçkidə daha çox səs topladı. Üzvlər onu bələdiyyə sədri seçdilər. O, canla-başla işə başladı. Daxili inamı və bacarığı ona uğurlar gətirdi. Bələdiyyə sədri kimi yorulmaq bilmədən çalışdı, insanların ona  inamını artırdı. Sakinlərlə həm səyyar, həm də fərdi görüşlər daha çox səmərə verdi. Qəsəbə Bələdiyyəsinin yerləşdiyi ünvan sakinlərin problemlərin həll olunacaq bir ümid yeri oldu. Tünzalə xanım dəfələrlə şəhid ailələri ilə görüşüb onların ehtiyacları ilə maraqlandı.

  Əlbəttə ki, bələdiyyə işi təkcə fərdlərin problemlərindən ibarət deyildir. Bələdiyyəni əhatə edən Boradigah qəsəbəsinin, Mollaoba və Babaser kəndlərinin həllini gözləyən bir çox problemləri mövcuddur. Bələdiyyə ərazisində abadlıq-quruculuq işlərinin aparılması Tünzalə xanımın daha çox diqqətində olmuşdur. Bu barədə özü belə danışır:

  - Çalışırıq ki, Bələdiyyəmiz günü-gündən gözəlləşsin. Həm xeyriyyəçilərin, həm də bələdiyyə fondunun hesabına abadlıq işlərini genişləndiririk. Bir çox küçələrə çınqıl və asfalt döşənmişdir. Asfalt çəkilmiş belə küçələrdən biri də şəhid İbrahim Rükabzadənin ailəsinin yaşadığı 200 metrlik küçədir.

  Yanvar ayının sonunda Boradigah Bələdiyyəsinin bir illik hesabat yığıncağı oldu. Tünzalə Qardaşova sakinlər qarşısında məruzə ilə çıxış etdi. Məruzə dolğunluğu və şəffaflığı ilə seçilirdi. Xüsusilə, sadalanan rəqəmlər uğurlardan xəbər verirdi. Məsələn, əgər 2024-cü ildə torpaq vergisi üzrə daxilolmalar 3633 manat, əmlak vergisi üzrə 2537 manat, torpaq icarə haqları üzrə isə 6686 manat olmuşdusa, 2025-ci ildə daxilolmalar müvafiq olaraq 4134 manat, 4500 manat və 9600 manat olmuşdur. Amma məruzəçi qeyd etdi ki, Bələdiyyə bu göstəricilərlə razı deyil. Növbəti illərdə daxilolmaların həcmi daha yüksək səviyyədə formalaşacaqdır.
  Bir sözlə, Boradigah Bələdiyyəsi inkişaf yolundadır. Bu yazını sonda Tünzalə Qardaşovanın  sözləri ilə bitirmək istəyirəm:

  - Əldə edilən hər bir uğur məni ruhlandırır. Sakinlərin sevgisini qazanmaq gözəl hissdir. Sevinirəm ki, onların mənə inamı daim artır.





Rasim ƏZİMOV,
təqaüddə olan müəllim,  
ştatdankənar müxbirimiz.                                                                                              шаблоны для dle 11.2