Allah rəhmət eləsin
- 7-02-2026, 13:52
- Maraqlı
- 0
- 1 127
Qardaş Məhərrəm oğlu Fətullayev
Masallı rayon ictimaiyyətinə ağır itki üz verib. Gözəl insan, dəyərli ziyalı - aqğsaqqal, Masallı rayonunun təsərrüfat, iqtisadi - siyasi həyatında böyük əməyi olan, "Masallı ziyalıları"İctimai Birliyinin sədri, Yeni Azərbaycan Partiyasının üzvü Qardaş Fətullayev 79 yaşında, 6 fevral 2026-cı ildə yaşadığı Masallı şəhərində, yol-nəqliyyat hadisəsi nəticəsində faciəli şəkildə dünyasını dəyişib.
Qardaş Məhərrəm oğlu Fətullayev 1947-ci ildə Masallının İkinci Yeddioymaq kəndində, kolxozçu ailəsində anadan olub. Orta məktəbi Yeddioymaq kəndində bitirib. Bakıda, V.İ.Lenin adına Azərbaycan Dövlət İnstitutunda (indiki ADPU) ali təhsil aldıqdan sonra müxtəlif vəzifələrdə çalışıb.
Yeddioymaq kənd tam orta məktəbində riyaziyyat müəllim kimi fəaliyyətə başlamış, bir il altı ay müəllim işlədikdən sonra Masallı Rayon Komsomol Komitəsinin birinci katibi vəzifəsinə seçilib. Doqquz il bu vəzifədə işləyib.Sonra 14 il ərzində Masallı rayon XDS İcraiyyə Komitəsinin sədr müavini, rayon Məişət Xidməti Kombinatının rəisi, yerli istehsal Kombinatının direktoru vəzifələrində çalışıb.
YAP Masallı Rayon Təşkilatının, təhsil şöbəsinin, rayon Ağsaqqallar Şurasının, rayon təhsil işçiləri həmkarlar şurasının üzvü olub.
O, işlədiyi bütün vəzifələrdə işin məsuliyyətini dərindən dərk edərək şərəflə çalışmış, dövlət plan - tapşırıqlarını artıqlaması ilə yerinə yetirməklə yanaşı yaxşı təşkilatçı kimi tanınıb.
Komsomol kadrlarının hazırlanmasında Q.Fətullayevin böyük rolu olmuşdur.
“Şərəf nişanı” ordeni, “Əmək igidliyinə görə”, “Tərəqqi”, “Heydər Əliyevin 100 iliyi” yubiley medalı ilə təltif olunub.
Qardaş müəllim gözəl ailə başçısı idi.
Bütün ömrünü Vətənin, rayonun çiçəklənməsinə, övladlarının təhsilinə sərf edən Qardaş Fətullayevin əziz xatirəsi onu tanıyanların qəlbində silinməyəcək.
Allah rəhmət eləsin.
