Ərazi nümayəndəsinin tribunası

 

“Yeni həyat” qəzetinin və eyni adlı saytın əməkdaşı bu günlərdə Masallı RİHB-nin Masallı şəhər İƏD-si üzrə nümayəndəsi Həbib Həbibovla görüşmüş, onunla yollarda aparılan təmir işləri və qarşıda duran mühüm vəzifələr haqqında müsahibə verməsini xahiş etmişdir. O, demişdir:

-Masallı şəhər inzibati ərazi dairəsi üzrə nümayəndəliyi  2025-ci il ərzində ərazidə sosial-iqtisadi infrastrukturun yaxşılaşdırılması, əhalinin yaşayış şəraitinin yüksəldilməsi və şəhərin ümumi görkəminin abadlaşdırılması istiqamətində bir sıra mühüm tədbirlər həyata keçirmişdir. Nümayəndəlik dövlət satınalmaları qanunvericiliyinin tələblərinə uyğun şəhər ərazisində abadlıq işlərinin görülməsi, avtomobil yollarının əsaslı təmiri, eləcə də çoxmənzilli yaşayış binalarının əsaslı təmiri ilə bağlı kotirovka sorğuları təşkil edilmiş və müvafiq satınalma işləri həyata keçirilmişdir. Həmin satınalma işləri şəhər təsərrüfatının ehtiyaclarına uyğun müəyyən edilmiş, işlərin keyfiyyətli və vaxtında icrası yerinə yetirilmişdir. Şəhər ərazisində həyata keçirilmiş abadlıq işləri çərçivəsində ümumi istifadədə olan küçə və məhəllələrin səliqəyə salınması, piyada yollarının və səki hissələrinin bərpası, yaşıllıq sahələrinin salınması və abadlaşdırılması, ətraf mühitin sanitar vəziyyətinin yaxşılaşdırılması istiqamətində ardıcıl tədbirlər görülmüşdür.Bu işlər şəhər sakinlərinin gündəlik həyat şəraitinin yaxşılaşdırılmasına və şəhərin estetik görünüşünün yüksəldilməsinə xidmət etmişdir.

Avtomobil yollarının əsaslı təmiri üzrə aparılmış işlər şəhər daxilində nəqliyyatın hərəkətinin təhlükəsiz və rahat şəkildə təmin olunmasına yönəlmişdir. Təmir işləri zamanı yol örtüyünün tam yenilənməsi, əsaslı bərpa tədbirlərinin görülməsi, yol infrastrukturunun mövcud vəziyyətinin yaxşılaşdırılması təmin edilmişdir. 

Bu tədbirlər nəticəsində şəhər ərazisində nəqliyyat vasitələrinin hərəkəti üçün daha əlverişli şərait yaradılmışdır.Belə ki, ümumilikdə uzunluğu 9.98 kilometr olan 26 küçəyə 49538 kvadratmetr asfalt örtüyü döşənmiş və uzunluğu 1.74 kilometr olan 10 küçəyə və ara məhəllələrə 7380 kvadratmetr ölçüdə  qum-çınqıl qarışığısəpilmişdir. Yollarda avtomobillərin fasiləsiz və nizamlı hərəkəti üçün küçələrdə əlavə işıqforlar quraşdırılmış, qəzalı olan işıqforlar yeniləri ilə əvəz edilmiş, yol xətlərinin nişanlanması, ikitərəfli yolun açılması işləri görülmüşdür. Həmçinin şəhərin prospekt və küçələrinə 6 ədəd avtodayanacaqlarquraşdırılmışdır.

     

Ötən il dövlət büdcəsindən prospekt və küçələrin təmirinə ayrılmış  vəsait hesabına 14 küçədə piyada səkinin qurulması, küçələrin işıqlandırılması, parkların yenidən qurulması, yol boyu hasarların təmiri və digər işləryerinə yetirilmişdir.

   

Çoxmənzilli yaşayış binalarının əsaslı təmiri istiqamətində görülmüş işlər isə yaşayış fondunun qorunması və sakinlərin təhlükəsizliyinin təmin edilməsi baxımından xüsusi əhəmiyyət kəsb etmişdir.Təmir prosesində binaların ümumi konstruktiv elementlərinin bərpası, ümumi istifadə sahələrinin yaxşılaşdırılması və istismar müddətinin uzadılmasına yönəlmiş tədbirlər həyata keçirilmişdir. Bu işlər nəticəsində çoxmənzilli yaşayış binalarının texniki vəziyyəti əhəmiyyətli dərəcədə yaxşılaşdırılmışdır.

2025-ci il üçün şəhərin Qarabağ və Heydər Əliyev prospektində yerləşən çoxmənzilli yaşayış binalarının girişində, fasadlarında, su novlarında təmir işləri, həmçinin həyətlərində abad məhəllələr yaradılmışdır.Burada söhbətgah yerləri quraşdırılmış, uşaq əyləncə dəstləri, idman qurğuları quraşdırılmış və ərazinin işıqlnadırılması təmin edilmişdir. 

     

Yuxarıda sadalanan işlərin davamı olaraq 2026-cı ildə şəhərimizdə küçə və məhəllərarası yolların təmir edilməsindən ötrü 45-ə yaxın küçədə asfalt işlərinin görülməsi, 12 küçədə piyada səkilərinin qurulması, küçə boyu hasarların təmiri, həmçinin işıqlandırılması, şəhərin giriş hissəsində müasir üslubda giriş qapısının inşa edilməsi, əhalinin sıx olduğu park və digər yerlərdə sanitar qovşaqlarının tikilməsi və şəhərdəki 26 çoxmənzilli yaşayaış binalarında təmir və abadlıq işlərinin aparılması nəzərdə tutulmuşdur. 

     

Gələcək dövrdə də şəhər inzibati ərazi dairəsi infrastrukturun daha da inkişaf etdirilməsi, abadlıq və təmir işlərinin davam etdirilməsi, sakinlərin rifahının yüksəldilməsi istiqamətində müvafiq tədbirlərin görülməsi nəzərdə tutulur.

    

-Müsahibəyə görə sağ olun.

-Diqqətinizə görə təşəkkür edirəm.