Masallıda rayon rəhbəri şəhər sakinləri ilə görüş keçirdi
03 dekabr 2025-ci il tarixdə Masallı rayon Mədəniyyət Mərkəzində Masallı rayon İcra Hakimiyyətinin başçısı Araz Əhmədov şəhər sakinləri ilə görüş keçirmişdir.
Görüşü açan rayon rəhbəri rayonun sosial-iqtisadi inkişafından bəhs edərək mövcud problemlərinin bilindiyini və mərhələli şəkildə həll olunduğunu görüş iştirakçılarının nəzərinə çatdırmışdır.
Masallı şəhərində 3 il ərzində görülmüş işlər barədə məruzə ilə çıxış edən Masallı rayon İcra Hakimiyyəti başçısının Masallı şəhər inzibati ərazi dairəsi üzrə nümayəndəsi Həbib Həbibov bildirmişdir ki, Masallı şəhərində 2022-ci ildə ümumi uzunluğu 11.41 km olan 31 küçəyə, 2023-cü ildə ümumi uzunluğu 6.25 km olan 16 küçəyə, 2024-cü ildə ümumi uzunluğu 5.66 km olan 17 küçəyə və 2025-ci ümumi uzunluğu 9.1 km olan 26 küçəyə asfalt örtüyü döşənmişdir. Nümayəndə əlavə olaraq küçələrdə cari təmir işlərinin aparıldığını, parklarda, prospekt və küçərlədə abadlıq-quruculuq işlərinin davam etdiyini vurğulamışdır.
Sonra görüş qəbulunda iştirak edən vətəndaşlar tərəfindən bir sıra problemlər səsləndirilmiş və icrasına köməklik göstərilməsini xahiş etmişlər.
Rayon rəhbəri görüşü yekunlaşdıraraq vətəndaşlar tərəfindən qaldırılan məsələlərin çoxunun ən qısa zamanda həll olunacağını bildirmiş və zaman tələb edən digər məsələlərin nəzarətə götürülərək həlli istiqamətində qanunamüvafiq qaydada operativ şəkildə işlərin aparılacağını diqqətə çatdırmışdır.
