Masallının Şərəfə kəndində 09 iyul 2025-ci il tarixdə səyyar qəbul
09 iyul 2025-ci il tarixdə rayonun Şərəfə kəndində Masallı Rayon İcra Hakimiyyətinin başçısı Araz Əhmədovun sakinlərlə növbəti səyyar görüş-qəbulu keçirilmişdir.
Masallı Rayon İcra Hakimiyyətinin başçısı Araz Əhmədov səyyar görüş-qəbulunu açaraq ərazinin tarixi, ziyalıları, ağsaqqalları, mədəniyyəti, məşğuliyyəti və sosial iqtisadi inkişafı barədə çıxış etmişdir.
Sonra rayon rəhbəri sözü Masallı Rayon İcra Hakimiyyəti başçısı aparatının Sənədlərlə və vətəndaşların müraciətləri ilə iş şöbəsinin müdiri Elvin Fəttayevə verərək ötən səyyar görüş-qəbulu zamanı vətəndaşların müraciətlərinin həlli vəziyyəti və ərazidə görülmüş işlər barədə ətraflı məlumat verməsini istəmişdir.
Sənədlərlə və vətəndaşların müraciətləri ilə iş şöbəsinin müdiri Elvin Fəttayevə çıxış edərək ərazidə ötən qəbul zamanı 5 nəfər vətəndaş tərəfindən 5 məsələ qaldırıldığını, 3-nün müsbət həll olunduğunu və 2 məsələ ilə bağlı vətəndaşa qanunamüvafiq cavab verildiyini bildirmişdir.
Sonra Elvin Fəttayev ərazidə görülmüş işlər barədə məlumat verərək qeyd etmişdir ki, şəhid ailələri, imtiyazlı şəxslərə və yardıma ehtiyacı olan insanlara məişət, kommunal və digər problemlərinin həlli ilə bağlı köməklik göstərilmiş, Şərəfə ərazisində 1.1 km kənddaxili yol və şəhid Ramazan Vəliyev adına küçənin 200 metrlik hissəsi cari təmir olunmuş, ərazidə 1 ədəd transformator, 27 ədəd yararsız elektrik dirəyi və 250 metr elektrik xətti yenisi ilə əvəz olunmuş, 3 km məsafədə küçələr işıqlandırılmış, 2.3 km məsafədə suaparıcı kanallar təmizlənmiş və suaparıcı kanalın keçidinə 6 ədəd 6 metrlik borular qoyulmuş, GPON lahiyəsi üzrə “Aztelekom” İB, “CityNet” MMC və “UniNet” MMC şirkətləri tərəfindən ərazidə yeni internet xətti çəkilərək əhalinin istifadəsinə verilmişdir.
Şöbə müdiri daha sonra “Yaşıl dünya naminə həmrəylik ili” çərçivəsində 300 ədəd, “Konstitusiya və Suverenlik ili” çərçivəsində isə 500 ədəd olmaqla ümumilikdə 800 ədəd ağac əkilməsi, Şərəfə kənd məscidində cari təmir işlərinin aparılması, Şərəfə kənd mərasim evinin əsaslı təmir olunması, ərazidə olan dövlət bayraqları və şəhid lövhələrinin yenilənməsi, Şərəfə kənd körpələr evi-uşağ bağçasının əsaslı təmir olunması, ərazidə hər ay 20 aztəminatlı ailəyə 600 manat dəyərində maddi yardım göstərilməsi və Şərəfə ərazisində ümumi sahəsi 1.2 ha olan idman meydançasının yenidən bərpa olunması barədə məlumatları görüş iştirakçılarının nəzərinə çatdırmışdır.
Sonra rayon rəhbəri qəbula gələn vətəndaşları narahat edən məsələlərlə bağlı müraciətlərini dinləmiş, qəbul zamanı qaldırılan məsələlərin qeydiyyata alınması və nəzarətdə saxlanılmasını təmin etmək məqsədi ilə tapşırıqlarını vermişdir.
Masallı rayon İcra Hakimiyyətinin başçısı Araz Əhmədov səyyar-görüş qəbulunu yekunlaşdıraraq rayonda vətəndaş müraciətlərinin daim diqqətdə saxlanıldığını bildirmişdir.
