Rayon rəhbəri Kolatan və Sığdaş ərazilərində xeyriyyə işlərinə yerində baxış keçirdi
06 oktyabr 2025-ci il tarixdə Masallı Rayon İcra Hakimiyyətinin başçısı cənab Araz Əhmədov rayonun Böyük Kolatan və Xanalıyan kəndlərində aparılan xeyriyyə işlərinə yerində baxış keçirmişdir.
Belə ki, Masallı rayonunun Böyük Kolatan kənd sakini Nizami Bağırov tərəfindən örnək addım atılaraq övladının Ümrə ziyarətindən qayıdışı ilə əlaqədar şəxsi vəsaiti hesabına xeyriyyə aksiyası həyata keçirib.
N.Bağırov beş il əvvəl asfaltlanmış Kolatan–Qodman avtomobil yolunun (1,5 km uzunluğunda) cari təmirinə start vermiş, layihə çərçivəsində yolda yaranmış çalalar aradan qaldırılmış, səth bərpa olunmuş və hərəkətin təhlükəsizliyi təmin edilmişdir.
Masallı rayon İcra Hakimiyyətinin başçısı Araz Əhmədov Kolatan kəndində aparılan təmir işləri ilə yerində tanış olaraqi bu nəcib təşəbbüsü yüksək qiymətləndirmiş və xeyriyyəçiyə ictimai maraqlara xidmət etdiyi üçün təşəkkür etmişdir.
Bu təşəbbüs bir daha göstərir ki, vətəndaşın öz kəndinə, yaşadığı mühitə olan sevgisi və qayğısı cəmiyyətin ümumi inkişafına real töhfə verir. Nizami Bağırovun bu davranışı kənd sakinləri tərəfindən də böyük rəğbətlə qarşılanıb və “xeyir işin ən gözəli budur” kimi dəyərləndirilib.
Eyni zamanda rayon rəhbəri Sığdaş ərazisinin Xanalıyan kəndində kəndin bir hissəsini digər hissəsi ilə birləşdirən çay üzərində quraşdırılmış suötürücü boruların üzərinin torpaqla örtülməsi və yolun bərkidilməsi işləri ilə də yerində tanış olmuşdur.
Hər iki yaşayış məntəqəsində görülmüş işlərlə bağlı Kolatan bələdiyyəsi tərəfindən rayon rəhbərinə ətraflı məlumat verilmişdir.
