Milli Qəhrəman Elşad Hüseynovun doğum günü ilə əlaqədar anım tədbiri
08 oktyabr 2025-ci il tarixində Masallı rayonunun Xıl kəndində Milli Qəhrəman Elşad Hüseynovun doğum günü münasibətilə anım tədbiri keçirilib.Tədbirdə Masallı Rayon İcra Hakimiyyətinin başçısı Araz Əhmədov, aparatın Vətən müharibəsi iştirakçıları və şəhid ailələri ilə işin təşkili şöbəsinin müdiri Qəşəm Hadiyev, aparatın əməkdaşları, Masallı rayon Polis şöbəsinin əməkdaşları, ərazi nümayəndəliyi, bələdiyyə, şəhidin ailə üzvləri, media nümayəndələri, kənd sakinləri, din xadimləri, məktəb kollektivi və şagirdlər iştirak etmişlər.
Əvvəlcə qəhrəmanın xatirəsi bir dəqiqəlik sükutla yad edilib, abidəsi önünə gül dəstələri qoyulub. Tədbirdə çıxış edən Masallı Rayon İcra Hakimiyyətinin başçısı Araz Əhmədov Milli Qəhrəman Elşad Hüseynovun qəhrəmanlıq yolundan danışaraq onun göstərdiyi igidliyin gənc nəslə örnək olduğunu bildirmişdir. Dövlətimizin şəhid ailələrinə göstərdiyi yüksək diqqət və qayğıdan söz açmış, Vətənimizin azadlığı və suverenliyi uğrunda canından keçən şəhidlərimizin xatirəsinin daim uca tutulduğunu qeyd edərək Azərbaycanın əldə etdiyi tarixi zəfərin şəhidlərimizin misilsiz fədakarlığı sayəsində mümkün olduğunu vurğulamışdır.
Daha sonra Milli Qəhrəmanın qızı, kənd ziyalısı və din xadimi çıxış edərək Milli Qəhrəman Elşad Hüseynovun həyat və döyüş yolundan, Vətənə sədaqət və fədakarlıq nümunəsindən danışıblar.
Tədbirdə məktəbli uşaqlar “Vətənpərvərlik” mövzusunda şeirlər səsləndiriblər.
