Masallıda “Sitrus, çay və çiyələk əkini ilə bağlı görülmüş işlər və qarşıda duran vəzifələr” mövzusunda zona müşavirəsi
19 noyabr 2025-ci il tarixdə Masallı rayonu Mahmudavar kəndində “Sitrus, çay və çiyələk əkini ilə bağlı görülmüş işlər və qarşıda duran vəzifələr” mövzusunda zona müşavirəsi keçirilmişdir.
Müşavirədə Masallı Rayon İcra Hakimiyyətinin başçısı Araz Əhmədov və aparatı, idarə, müəssisə, təşkilat rəhbərləri, ərazi nümayəndələri, bələdiyyə sədrləri və 150 nəfər fermer-torpaq mülkiyyətçisi iştirak etmişdir.
Tədbirdən öncə müşavirə iştirakçıları Mahmudavar kəndində fəaliyyət göstərən “Baba Bulağı” MMC-yə məxsus meyvəqurutma sexinə, yeni yaradılmış, sutkalıq gücü 1.5 ton olan mini çay fabrikinə, eləcə də rayonda istehsal olunan kənd təsərrüfatı məhsulları guşəsinə baxış keçirmişlər.
Müşavirəni giriş sözü ilə açan Masallı Rayon İcra Hakimiyyətinin başçısı Araz Əhmədov bildirmişdir ki, Azərbaycan Respublikası Prezidentinin 2016-cı il 6 dekabr tarixli 1138 nömrəli Fərmanı ilə Azərbaycan Respublikasında kənd təsərrüfatı məhsullarının istehsalına və emalına dair Strateji Yol Xəritəsi hazırlanmışdır. Bu Strateji Yol Xəritəsində ölkənin kənd təsərrüfatı sahəsinin inkişafı ilə bağlı 2020-ci ilədək strateji baxış, 2025-ci ilədək olan dövr üçün uzunmüddətli baxış və 2025-ci ildən sonrakı dövr üçün hədəf baxış əks olunub ki, bu da kənd təsərrüfatı sahəsində həm orta, həm də uzunmüddətli dövr üzrə strateji inkişaf hədəflərinə çatmaq üçün dövlətin ardıcıl mərhələlərlə icra ediləcək aydın yol xəritəsinə malik olmasını ifadə edir.
Məlum olduğu kimi, ölkəmizdə qeyri- neft sektorunun inkişafı istiqamətində davamlı işlər görülür və qərarlar qəbul edilir. Buna misal olaraq ölkədə kənd təsərrüfatı məhsulları istehsalçılarının texnika ilə təminatının yaxşılaşdırılması, fermerlərə güzəştli şərtlərlə aqrotexniki xidmətlər göstərilməsi, kənd təsərrüfatı texnikasının, texnoloji avadanlığın, suvarma sistemləri avadanlığının güzəştli şərtlərlə satışı, krediti və lizinqinin maliyyələşdirilməsi istiqamətində mühüm işlər görülmüşdür.
Ölkəmizdə məhsul istehsalçılarına göstərilən dövlət dəstəyi aqrar bölmənin digər sahələri kimi, sitrus meyvəçiliyi, çay və çəltikçiliyin inkişafı üçün də geniş imkanlar yaradıb. Kənd təsərrüfatının bu sahəsinin inkişafına son illərdə dövlət tərəfindən ciddi diqqət yetirilməsi idxaldan asılılığı azaltmaq baxımından mühüm əhəmiyyət daşıyır.
Tədbirdə Masallı Dövlət Aqrar İnkişaf Mərkəzinin direktoru Seymur Nuriyev məruzəsində qeyd etmişdir ki, ölkəmizdə həyata keçirilən regionların sosial-iqtisadi inkişaf proqramları qeyri-neft sektorunun, o cümlədən aqrar sahənin inkişafını təmin etməklə yanaşı, kənd əhalisinin sosial rifahının yaxşılaşdırılması, məşğulluq səviyyəsinin yüksəldilməsi sahəsində də əhəmiyyətli rol oynayır. Hal-hazırda ənənəvi kənd təsərrüfatı sahələrinin inkişafı ölkədə həyata keçirilən aqrar siyasətin əsas istiqamətlərindəndir.
Rayonumuz əhalinin sayına və bu nisbətdə adam başına düşən torpaq sahəsinin azlığına görə espublikamızda ilk yerlərdən birini tutur . Masallı rayonunda kənd təsərrüfatına yararlı 32519 ha torpaq sahəsinin 26722 hektarı xüsusi mülkiyyətə verilmiş pay torpaqları təşkil edir. Torpaqları 24907 ha əkin kateqoriyasıda olan torpaq sahəsidir ki, bunun da 10197 ha suvarılan torpaq sahələridir.
Masallı Su Meliorasiya Sistemlərinin İstismarı İdarəsinin rəisi Akif Həmidov müşavirədə qeyd etmişdir ki, Masallı Su Meliorasiya Sistemlərinin İstismarı İdarəsinin əsas iş istiqaməti abonentləri içməli su və kanalizasiya xidməti, kənd təsərrüfatı bitkilərini suvarma suyu ilə təmin etmək, bundan başqa rayon ərazisində suvarma şəbəkələrinin istismarını həyata keçirmək və onlara nəzarət etməkdən ibarətdir.
Rayon ərazisində 10131 ha əkin sahələrinin suvarma suyuna olan tələbatı Masallı Su Meliorasiya Sistemlərinin İstismarı İdarəsinin balansında olan Viləşçay su anbarı, Babaser su anbarı, sututarlar və artezian quyuları vasitəsilə təmin olunur. Suvarma suyunun itkisiz və maneəsiz tələbatçılara çatdırılmasından ötrü idarənin Xırmandalı, Həsənli, Köçəkli, Qarğalıq, Xıl, Gəyəçöl, Boradigah, Babaser və digər kəndlərində olan suvarma kanallarında lildən təmizlənmə, sahilbərkitmə işləri görülmüş və hazırda da bu istiqamətdə işlərimiz davam etdirilir. Həmçinin Boradigah çayının məcrasında cari ilin iyul ayından genişləndirmə, habelə lildən, kol-kosdan və məişət tullantılardan təmizləmə işləri aparılır. Bundan başqa Xanalıyan kəndi ərazisindəki təsərrüfatlar arası kanallarda da lildən və kol-kosdan təmizləmə işləri görülmüşdür.
Müşavirədə “Baba Bulağı” MMC-nin rəhbəri Zəmanə Babayeva-Cəfərzadə sitrus və çayçılıq, Şamaxı rayon sakini, fermer Seyran Muradov çiyələkçilik, Kolatan kənd sakini, fermer Fikrət Məmmədov sitrus və çayçılıq barədə çıxışlar etmişlər.
Fermerlər onlara göstərilən diqqət, qayğı və yaradılmış şəraitə görə Azərbaycan Respublikasının Prezidenti Cənab İlham Əliyevə dərin minnətdarlıqlarını bildirmişlər.
Sonda fermer və torpaq mülkiyyətçilərinin sualları cavablandırıldı.
