Masallı məktəbliləri Quba, Qusar və Xaçmaz rayonlarına yola düşüblər
- 26-03-2018, 16:44
- Təhsil
- 0
- 2 304
Masallı məktəbliləri Quba, Qusar və Xaçmaz rayonlarına yola düşüblər
“Ölkəmizi tanıyaq” devizi ilə keçirilən maarifləndirici tur-aksiyanın növbəti mərhələsi çərçivəsində Masallı rayonunun məktəbliləri Quba-Qusar-Xaçmaz marşrutu üzrə yola düşüblər.
Martın 26-da səhər saatlarında şagirdlər yola düşməzdən öncə əvvəlcə ümummilli lider Heydər Əliyevin adını daşıyan mərkəzin qarşısına toplaşıblar.
Rayon ictimaiyyəti nümayəndələrinin, valideyn və müəllimlərin iştirak etdiyi yolasalma mərasimində çıxış edən Masallı Rayon İcra Hakimiyyəti başçısı cənab Rafil Hüseynov bildirib ki, tur-aksiya yeni nəslin vətənpərvərlik ruhunun formalaşmasında, ölkəmizin hər guşəsinin tanıdılmasında böyük rol oynayır. Bu, həm də Prezident İlham Əliyevin, Azərbaycanın Birinci vitse-prezidenti Mehriban xanım Əliyevanın gənc və yeniyetmələrə qayğısının əyani təzahürüdür. Cənab başçı gəncləri bu fürsətdən faydalanmağa, bölgələr haqqında dərin məlumatlar əldə etməyə çağırıb.
Mərasimdə respublikamızda gənc nəslin təlim-tərbiyəsi istiqamətində görülən işlərdən də danışılıb.
Müəllim Rüfət Rufullayev, Həsənli kənd orta məktəbinin dərs əlaçısı Səkinə Vəliyeva və başqaları çıxış edib Prezident İlham Əliyevə dərin minnətdarlıqlarını bildiriblər.
Qeyd olunub ki, ekskursiya çərçivəsində şagirdlər Quba, Qusar və Xaçmaz rayonlarında fəaliyyət göstərən Heydər Əliyev mərkəzləri, tarixi, mədəni abidələr, yeni və müasir binalar, qoruqlar, park və xiyabanlar, turizm məkanları ilə yaxından tanış olacaq, musiqili-əyləncəli proqramlarda iştirak edəcəklər.
Bir neçə gün davam edəcək tur-aksiyanı 40 şagird və 5 nəzarətçi müəllim, bir həkim müşayiət edəcək.
Məktəblilər şən musiqi sədaları altında xüsusi avtobusla yola salınıblar.
“Yeni həyat”,
www.yeniheyet.az
