İki əsgərin bir masalı...

Bu gün, iyulun 8-də Masallı rayon Mərkəzi Kitabxanasında Masallı rayon MKS-nin təşkilatçılığı, rayon Ağsaqqallar Şurası və Azərbaycan Respublikası Müharibə, Əmək və Silahlı Qüvvələr Veteranları Təşkilatı Masallı rayon təşkilatının təşəbbüsü ilə 2025-ci il “Konstitusiya və Suverenlik ili” çərçivəsində Azərbaycan Jurnalistlər Birliyinin üzvü, “Qızıl Qələm” media mükafatının laureatı, yazıçı-publisist Firuzə Bəyməmmədqızının “İki əsgərin bir masalı” kitabının təqdimatı keçirilib. Tədbirdə ictimaiyyət nümayəndələri, rayon ziyalıları və Masallı Regional Kollecinin tələbələri iştirak ediblər.  

Tədbir başlamazdan öncə Ulu Öndər Heydər Əliyevin və Azərbaycan Respublikasının suverenliyi və ərazi bütövlüyü uğrunda canından keçən şəhidlərimizin əziz xatirəsinin 1 dəqiqəlik sükutla yad olunub. Tədbirdə ilk çıxış edən kitabxananın direktoru vəzifəsini müvəqqəti icra edən Günay Xəlilova tədbir iştirakçılarını salamlayaraq Mərkəzi Kitabxanada mütəmadi olaraq yazıçı və şairlərlə görüşlər təşkil edildiyini, kitab təqdimatlarının keçirildiyini bildirib. O, bu gün keçirilən tədbirin Firuzə Bəyməmmədqızının “İki əsgərin bir masalı” kitabının təqdimatına həsr olunduğunu və bu kitabın canını Vətən uğrunda qurban vermiş şəhid qardaşların, Aprel döyüşləri şəhidi Nurlan Əsgərli, Vətən Müharibəsi Qəhrəmanı İntiqam Əsgərli həyat və döyüş yoluna işıq saldığını diqqətə çatdırıb.
Sonra rayon Ağsaqqallar Şurasının sədri Ələşrəf Niftiyev torpaqlarımızı işğaldan azad edən və ərazi bütövlüyümüzü bərpa edən hər bir şəhidimizin qəhrəmanlıq təcəssümü olduğunu, onların dövlətimiz tərəfindən yüksək qiymətləndirildiyindən söz açıb.

 Masallı  Rayon İcra Hakimiyyəti  Başçısı aparatının İctimai-siyasi və humanitar məsələlər şöbəsinin baş məsləhətçisi Nuranə Muradova qəhrəman şəhidlərimizin qəlbimizdə hər zaman yaşadığını, Vətənpərvərlik hissi ilə yazılan bu kitabın yazıçının daha bir uğurlu addımı olduğunu söyləyib. O, belə tədbirlərin və kitab təqdimatlarının gənc nəsildə vətənpərvərlik ruhunun daha da möhkəmlənməsi baxımından xüsusi əhəmiyyət kəsb etdiyini vurğulayıb.
Azərbaycan Respublikası Müharibə, Əmək və Silahlı Qüvvələr Veteranları Təşkilatı Masallı rayon təşkilatının sədri Ramiz Tağıyev çıxışında dövlət müstəqilliyimizin ilk illərində torpaqlarımızın işğala məruz qaldığını və belə çətin bir dönəmdə ulu öndər, ümummilli lider Heydər Əliyevin hakimiyyət başına gəldiyini, ordu quruculuğuna nail olduğunu vurğulayıb. Onun siyasi varisi, möhtərəm Prezidentimizin rəhbərliyi altında şanlı ordumuzun xalqımıza qələbə sevinci yaşatdığını bildirib.

Tədbirdə çıxış edən pedaqoq, ziyalı Oqtay Həsənli, əməkdar jurnalist Zakir Abbas, şairə Meysaba Aslanova və digərləri çıxışlarında qəhrəman şəhidlərimizin xatirəsinə həsr olunmuş bir çox kitabların qələmə alındığını və bu kitabın da eyni qəbildən olduğunu vurğulayıb. Çıxışlarda həyatı əks etdirən materiallardan ibarət sənədli əsər olan bu kitabın tarixi həyatla ön cəbhənin vəhdət təşkil etdiyi qeyd olunub. Şəhid qardaşların anası Ziba Əsgərli ürək sözlərini dilə gətirərək uşaqları körpə yaşlarından Vətənə məhəbbət, düşmənə nifrət ruhunda böyütdüyünü bildirib. Tədbir çərçivəsində Ə. Niftiyev rəhbəri olduğu qurum adından müəllifə fəxri fərman və qələmə aldığı kitablardan təqdim edib. Tədbirin sonunda müəllif qələmə aldığı kitab haqqında təəssüratlarını bölüşərək, ona yaradılan bu şəraitə görə kitabxana rəhbərliyinə və digər təşkilatçılara öz minnətdarlığını bildirib.
Tədbirin sonunda xatirə şəkli çəkilib.









шаблоны для dle 11.2