Tanınmış həkim Vaqif Əhmədovun 85 illiyi qeyd olunub

Bu gün, 13 dekabr 2025-ci ildə Masallı Rayon Mərkəzi Xəstəxanasının akt zalında rayon səhiyyəsinin inkişaf etməsində müstəsna xidmətləri olmuş, şərəfli ömür yolu keçmiş, xeyirxah və qayğıkeş insan Vaqif Əhmədovun anadan olmasının 85 illik yubileyi qeyd edilib.

Tədbirdə Bakının və Masallının səhiyyə işçiləri, ictimaiyyət nümayəndələri, ailə üzvləri, qohum və dostları, KİV nümayəndələri iştirak ediblər.

Tədbir Ulu Öndərin əziz xatirəsinin və şəhidlərimizin bir dəqiqəlik sükutla yad edilməsi ilə başlanıb.

Tədbiri Masallı Rayon Ağsaqqallar Şurasının sədri, Azərbaycan  Yazıçılar Birliyinin və Jurnalistlər Birliyinin üzvü   Ələşrəf Niftiyev açmışdır.

Sonra yubilyarın həyat və fəaliyyəti haqqında ətraflı məlumat verilib. 

Masallı Rayon Mərkəzi Xəstəxanasının baş həkimi İlqar Ramiz oğlu qeyd edib ki, Vaqif Əbülfəz oğlu Əhmədov 16 dekabr 1940-cı ildə Masallının Çaxırlı kəndində, rayonumuzun dəyərli ziyalılarından olan, vaxtilə Digah məktəbinin direktoru olmuş Əbülfəz müəllimin ailəsində dünyaya göz açıb. Vaqifin yaş yarımı olmamış atası 21 mart 1942-ci ildə Böyük Vətən Müharibəsinə göndərilir, 1944-cü ilin 23 iyununda almanlarla qızğın döyüşlkərdə həlak olur, qara kağızı gəlir... Vaqif ilk təhsilini 1948-1955-ci illərdə Çaxırlı yeddi illik məktəbində alıb. 1955-1958-ci illərdə qonşu Təklədə tam orta təhsilini başa vurub. Elə həmin ili sənədlərini Azərbaycan Tibb Universitetinə təqdim edib, imtahanları müvəffəqiyyətlə verib ora qəbul olunub. 1964-cü ildə institutu bitirdikdən sonra Masallı Rayon Mərkəzi Xəstəxanasında (RMX) rentgenoloq-terapevt kimi əmək fəaliyyətinə başlayır. 

   1968-ci ildə cərrah kimi fəliyyətə başlayır. 1968 -1970-ci illərdə hərbi xidmətdə - hərbi hissələrdə baş həkim kimi fəaliyyət göstərib. 1970-ci ildən Masallı RMX-da həkim - travmatoloq və ictimai əsaslarla ilk partiya təşkilatının katibi vəzifəsinndə işləmişdir. 1975-ci ildə ilk dəfə Masallı RMX-da aşağı ətrafların amputasiya əməliyyatını keçirmişdir. 1976-cı ildə ilk dəfə Mərkəzdən gələn həkimin iştirakı ilə neyro-cərrahiyyə əməliyyatı aparmışdır.1978-ci ildən Masallı RMX-nın baş həkiminin müavini və mərkəzi xəstəxananın müdiri işləmişdir. 1981-ci ildən Masallı RMX-nın baş həkimi kimi fəaliyyət göstərmişdir. 1982-ci ildə respublikamızda malyariya xəstəliyi qeydə alınan dövrdə, RMX-nın yeni binasının tikintisinə başlanılmışdı. Həmin dövr rayonda səhiyyəyə rəhbərlik edən şəxsdən böyük əzmkarlıqla çalışmaq tələb edilirdi. 

Masallı Rayon İcra Hakimiyyətinin aparatının İctimai-siyasi və humanitar məsələlər şöbəsinin müdir müavini Abbas Abbaszadə RİH başçısı cənab Araz Əhmədovun yubilyara salamlarını çatdırıb və hədiyyəsini təqdim edib. 

Yubiley tədbirində çıxış edən Yeni Azərbaycan Partiyası Masallı Rayon Təçkilatının sədri Seyfəddin Əliyev, Azərbaycan Ağsaqqallar Şurasının sədrinin müavini, akademik Abel Məhərrəmov, tanınmış mama - ginekoloq Xalidə Sadıqova, yazıçı-publisist və araşdırmaçı Xodaşirin Cəbiyev, Əmək və Silahlı Qüvvələri Veteranları Təşkilatının rayon şöbəsinin sədri Ramiz Tağıyev, Köhnə Alvadı kəndindən veteran müəllim Cəbrayıl İsmayılov, veteran müəllim Asuda Məmmdova, veteran müəllim –şair Əlizamin Baxış, qayını, həkim Qılman İsmayılov, veteran həkim Mirnizam Vahabov, qızı Aysun Aslanova, veteran həkim, həvəskar şair Əhmədağa Adilov, iqtisadçı alım Mübariz Məmmədli və başqaları qeyd ediblər ki, ömrünün 85-ci baharını yaşayan Vaqif həkim müqəddəs Hipokrat andına sadiq qalan, Masallının zəngin səhiyyə ənənələrini yaşadıb inkişaf etdirən, əhalinin sağlamlığının qorunmasını hər şeydən üstün tutan, insanlara həssas, qayğıkeş münasibət bəsləməsi ilə seçilən tibb işçilərimizdəndir. Hazırda təkcə Masallı rayonunda deyil, Cənubda yetərincə tanınan Vaqif həkimin ömür salnaməsi mənalı sətirlərlə zəngindir.

Vaqif Əhmədov göstərilən diqqət, fəaliyyətinə verilən qiymət üçün minnətdarlığını bildirib.